Foto: Kazinform

QR Ükimeti "Nwrlı jer" bağdarlaması ayasında jeke twrğın üy qwrılısı men päter satıp alu boyınşa alğaşqı jarna mölşerin tömendetudi josparlap otırğan joq. Bwl turalı QR Investiciyalar jäne damu ministri Jeñis Qasımbek halıqqa esep beru kezinde mälimdedi.

Onıñ sözinşe, 30% deñgeyindegi jarna mölşeri kredit töleu kezinde azamattarğa qiındıq tumas üşin tiimdi.

«Ükimet "Nwrlı jer" bağdarlamasın jasağan kezde bwl mäseleni barınşa qaradı. Mısalı bwrın "Twrğın üy qwrılıs jinaq bankinen" kredit alğan kezde alğaşqı jarna mölşeri 50% bolğan. Al keyin "Bäyterek" holdingimen bolğan talqılaulardan keyin mölşeri 30%-ğa deyin tüsti», - dedi Qasımbek.

Ministrdiñ aytuınşa, qazirgi kezde azamattar tarapınan "jarna 15%-ğa tüsem me?" degen swraqtar kelip jatqan körinedi.

«15% jasauğa boladı, alayda mwnday jağdayda ay sayınğı tölem mölşeri joğarılap ketedi jäne TÜQJB salımşıları bwl auırtpalıqtı kötere almauı mümkin. Sondıqtan biz 30%-ğa toqtadıq. Bwl dwrıs, ob'ektivti cifr dep oylaymız. Qazaqstandağı ortaşa jalaqını esepke alsaq, qiındıqtardı jeñildetuge mümkindik beredi", - dedi ol.

Ayta keteyik, «Nwrlı jer» bağdarlaması boyınşa 15 jılda 1,5 millionğa juıq qoljetimdi twrğın üy salu josparlanğan. Bağdarlamanıñ negizgi maqsatı - halıqqa twrğın üydiñ qoljetimdiligin odan äri arttırudı qamtamasız etetin twrğın üy qwrılısın damıtu mäselelerin keşendi şeşu. Degenmen ekonomisterdiñ pikirine sensek, memleket jalpı işki önimge arqa süyep, twrğın üy narığına barınşa aralasıp otır. Al bwl şın mäninde sätsiz qadam.

“The Qazaq Times”