Foto: Kazday

Bizdiñ elde köktemde qar erip, jañbır jauatının biliktegi atqaminerler äli künge deyin bilmey kele jatqanına biraz uaqıt boldı. Biıl Aqmola, Pavlodar, Qarağandı oblıstarın qar suı basıp jatsa, Almatı köşelerin keşeden beri jauğan jauın bir-aq künde Veneciyağa aynaldırıp şığa keldi.

Tauğa tikwşaqpen şığıp, şañğımen sırğanap tüsetin Ahmetjan Esimovtıñ kezinde Almatı halqı qısta qardıñ astında, köktemde sudıñ işinde jüretin edi. Al, Bauırjan Baybek äkim bolıp kelgeli oñtüstik astana köşelerinde ne özgerdi? Kim, qanday özgeris bayqadı? Mısalı, biz mınaday özgeris bayqadıq. Avtobustarda validator orınına oñay keldi. Köşelerde jarnama bilbordtarı azayıp, aqılı velosippetter köbeydi. Avtobustar ğana jüretin jol payda boldı. Este qalğan, közge tüsken özgerister osı.  Endi ne özgermedi degen zañdı swraq tuadı? Baraholka bazarı bayağıday jılına bir, eki ret örtenip twradı. Almatı jwrtı qısta şañğımen, köktemde qayıqpen jüruin äli qoymadı. Al şwrq tesik joldar Almatınıñ ğana emes, bükil Qazaqstannıñ mäñgilik trendine aynaldı. Esimovtan keyin Baybekke estelikke qalğan dünielerdiñ bastı reytingin qwraytın mäseleler osılar.

Biraq, biz bügin Almatı qalası men şet audandarındarınıñ su astında qalğanı jayında aytpaqpız. Keşegi jauğan jauınnıñ saldarınan Naurızbay audanında ornalasqan «Dostıq» kotedjder qalaşığı, äl-Farabi köşesindegi jer astı ötkelderi, «Almatı Optika» dükeni, «Aziya» bazarı, «Botagöz» balabaqşası su astında qalğan. Osı jerde bwğan kim kinäli degen tağı bir swraq tuadı sanalı adamnıñ basında. Arıqtardı dwrıs tazalamağan "Almatı tazalıq" pa, olardı dwrıs qadağalamağan Almatı äkimdigi ma, joq älde tabiğat pa? Bwl swraqqa jauaptı äkimdiktegiler aldağı uaqıtta bere jatar. Äzir bizge jañbır jauğan sayın üyrek wşıp, qaz qonarlıqtay su basatın Almatı köşeleriniñ äsem körkine tamsanıp jüruden basqa amal joq.

“The Qazaq Times”