Keşe memleket basşısı Nwrswltan Nazarbaev kezdesu barısında jaña Sırtqı ister ministri Q.Äbdirahmanovtı tanıstırdı dep habarlaydı «The Qazaq Times» Aqordanıñ baspasöz qızmetine silteme jasap.

Sonımen qatar, Nwrswltan Nazarbaev E.Idırısovtıñ Qazaqstan Respublikasınıñ Wlıbritaniyadağı elşisi bolıp tağayındalğanın aytıp, oğan vedomstvo basşısı qızmetinde atqarğan jwmısı üşin alğıs bildirdi.

Qazaqstan Prezidenti dağdarıs qwbılıstarı men özgergen jahandıq ahual jağdayında Sırtqı ister ministrligi aldında jaña közqarastı talap etetin köptegen jaña mindetter twrğanın atap ötti.

– Qazaqstan 1 qañtardan bastap Birikken Wlttar Wyımınıñ qauipsizdik Keñesindegi jwmısına kirisedi. Osı qwrılımğa twraqtı emes müşe bolıp saylanu – älemdik qoğamdastıqtıñ bizdiñ elimizge degen qwrmetiniñ ayğağı. Bwl – yadrolıq qarusız älem qalıptastıru jolındağı qozğalıs salasındağı jäne kün tärtibindegi özge de halıqaralıq mäseleler boyınşa Qazaqstannıñ jahandıq köşbasşılığın talap etetin jauaptı mindet, – dedi Memleket basşısı.

Sonday-aq, Qazaqstan Prezidenti qañtar ayında elimiz köptegen memleketterdiñ ökilderi qatısatın 28-inşi Düniejüzilik qısqı universiada ötkizetinin ayttı.

Bwdan bölek, Nwrswltan Nazarbaev mausım-qırküyek aylarında ötetin «Astana EKSPO-2017» halıqaralıq körmesi jöninde äñgimeledi.

– 112 memleket pen 18 halıqaralıq wyım ökilderi körmege qatısatındarın rastadı. İs-şaranıñ tabıstı ötui köbine Sırtqı ister ministrliginiñ jüyeli jwmısına baylanıstı, – dedi Memleket basşısı.

Qazaqstan Prezidenti tayau arada Astanada Siriya tüytkilderi jöninde  kelissöz jürgizuge mwqiyat dayındalu qajettigine toqtaldı.

Nwrswltan Nazarbaev wlttıq müddelerimizdi eskere otırıp, Euraziyalıq ekonomikalıq odaq ayasında meylinşe tiimdi jwmıstı jolğa qoyu qajettigin mañızdı mindet retinde atadı.

– Älemdik ekonomikalıq dağdarıs jağdayında eldiñ diplomatiyalıq qızmet organdarınıñ jwmısındağı eñ mañızdı jüyeli element ekonomikalıq ölşemder boluğa tiis. Investiciya tartu jäne otandıq tauarlar eksportı mäselelerimen aynalısu qajet. Osı orayda Sırtqı ister ministrligi men elşiliktiñ jwmısın küşeytu kerek. Keler jılı Astanada ötkizu josparlanıp otırğan auqımdı halıqaralıq is-şaralarğa – Şanhay ıntımaqtastıq wyımı men Islam ıntımaqtastıq wyımınıñ sammitterine tıñğılıqtı dayındalğan jön, – dedi Memleket basşısı.

Nwrswltan Nazarbaev elşilikter Qazaqstan men özge memleketter arasındağı sauda-ekonomikalıq uağdalastıqtarğa tiisti baqılau jasau salasında jwmıs jürgizui qajettigin arnayı atap ötip, elimizdi şet elderge tanıtatın ministrlik qızmetkerlerine joğarı jauapkerşilik jükteletinine,  sondıqtan kadr mäselelerine basa den qoyu kerektigine nazar audardı.

Soñında Memleket basşısı sırtqı sayasat vedomstvosı jwmısınıñ jaqsı deñgeyde ekenin atap ötip, jinalğandardıñ barlığın kele jatqan Jaña jılmen qwttıqtadı.