ن.نازارباەۆ جاڭا سىرتقى ىستەر ءمينيسترىن تانىستىردى

كەشە مەملەكەت باسشىسى نۇرسۇلتان نازارباەۆ كەزدەسۋ بارىسىندا جاڭا سىرتقى ىستەر ءمينيسترى ق.ءابدىراحمانوۆتى تانىستىردى دەپ حابارلايدى «The Qazaq Times» اقوردانىڭ ءباسپاسوز قىزمەتىنە سىلتەمە جاساپ.

سونىمەن قاتار، نۇرسۇلتان نازارباەۆ ە.ىدىرىسوۆتىڭ قازاقستان رەسپۋبليكاسىنىڭ ۇلىبريتانياداعى ەلشىسى بولىپ تاعايىندالعانىن ايتىپ، وعان ۆەدومستۆو باسشىسى قىزمەتىندە اتقارعان جۇمىسى ءۇشىن العىس ءبىلدىردى.

قازاقستان پرەزيدەنتى داعدارىس قۇبىلىستارى مەن وزگەرگەن جاھاندىق احۋال جاعدايىندا سىرتقى ىستەر مينيسترلىگى الدىندا جاڭا كوزقاراستى تالاپ ەتەتىن كوپتەگەن جاڭا مىندەتتەر تۇرعانىن اتاپ ءوتتى.

– قازاقستان 1 قاڭتاردان باستاپ بىرىككەن ۇلتتار ۇيىمىنىڭ قاۋىپسىزدىك كەڭەسىندەگى جۇمىسىنا كىرىسەدى. وسى قۇرىلىمعا تۇراقتى ەمەس مۇشە بولىپ سايلانۋ – الەمدىك قوعامداستىقتىڭ ءبىزدىڭ ەلىمىزگە دەگەن قۇرمەتىنىڭ ايعاعى. بۇل – يادرولىق قارۋسىز الەم قالىپتاستىرۋ جولىنداعى قوزعالىس سالاسىنداعى جانە كۇن تارتىبىندەگى وزگە دە حالىقارالىق ماسەلەلەر بويىنشا قازاقستاننىڭ جاھاندىق كوشباسشىلىعىن تالاپ ەتەتىن جاۋاپتى مىندەت، – دەدى مەملەكەت باسشىسى.

سونداي-اق، قازاقستان پرەزيدەنتى قاڭتار ايىندا ەلىمىز كوپتەگەن مەملەكەتتەردىڭ وكىلدەرى قاتىساتىن 28-ءىنشى دۇنيەجۇزىلىك قىسقى ۋنيۆەرسيادا وتكىزەتىنىن ايتتى.

بۇدان بولەك، نۇرسۇلتان نازارباەۆ ماۋسىم-قىركۇيەك ايلارىندا وتەتىن «استانا ەكسپو-2017» حالىقارالىق كورمەسى جونىندە اڭگىمەلەدى.

– 112 مەملەكەت پەن 18 حالىقارالىق ۇيىم وكىلدەرى كورمەگە قاتىساتىندارىن راستادى. ءىس-شارانىڭ تابىستى ءوتۋى كوبىنە سىرتقى ىستەر مينيسترلىگىنىڭ جۇيەلى جۇمىسىنا بايلانىستى، – دەدى مەملەكەت باسشىسى.

قازاقستان پرەزيدەنتى تاياۋ ارادا استانادا سيريا تۇيتكىلدەرى جونىندە  كەلىسسوز جۇرگىزۋگە مۇقيات دايىندالۋ قاجەتتىگىنە توقتالدى.

نۇرسۇلتان نازارباەۆ ۇلتتىق مۇددەلەرىمىزدى ەسكەرە وتىرىپ، ەۋرازيالىق ەكونوميكالىق وداق اياسىندا مەيلىنشە ءتيىمدى جۇمىستى جولعا قويۋ قاجەتتىگىن ماڭىزدى مىندەت رەتىندە اتادى.

– الەمدىك ەكونوميكالىق داعدارىس جاعدايىندا ەلدىڭ ديپلوماتيالىق قىزمەت ورگاندارىنىڭ جۇمىسىنداعى ەڭ ماڭىزدى جۇيەلى ەلەمەنت ەكونوميكالىق ولشەمدەر بولۋعا ءتيىس. ينۆەستيتسيا تارتۋ جانە وتاندىق تاۋارلار ەكسپورتى ماسەلەلەرىمەن اينالىسۋ قاجەت. وسى ورايدا سىرتقى ىستەر مينيسترلىگى مەن ەلشىلىكتىڭ جۇمىسىن كۇشەيتۋ كەرەك. كەلەر جىلى استانادا وتكىزۋ جوسپارلانىپ وتىرعان اۋقىمدى حالىقارالىق ءىس-شارالارعا – شانحاي ىنتىماقتاستىق ۇيىمى مەن يسلام ىنتىماقتاستىق ۇيىمىنىڭ سامميتتەرىنە تىڭعىلىقتى دايىندالعان ءجون، – دەدى مەملەكەت باسشىسى.

نۇرسۇلتان نازارباەۆ ەلشىلىكتەر قازاقستان مەن وزگە مەملەكەتتەر اراسىنداعى ساۋدا-ەكونوميكالىق ۋاعدالاستىقتارعا ءتيىستى باقىلاۋ جاساۋ سالاسىندا جۇمىس جۇرگىزۋى قاجەتتىگىن ارنايى اتاپ ءوتىپ، ەلىمىزدى شەت ەلدەرگە تانىتاتىن مينيسترلىك قىزمەتكەرلەرىنە جوعارى جاۋاپكەرشىلىك جۇكتەلەتىنىنە،  سوندىقتان كادر ماسەلەلەرىنە باسا دەن قويۋ كەرەكتىگىنە نازار اۋداردى.

سوڭىندا مەملەكەت باسشىسى سىرتقى ساياسات ۆەدومستۆوسى جۇمىسىنىڭ جاقسى دەڭگەيدە ەكەنىن اتاپ ءوتىپ، جينالعانداردىڭ بارلىعىن كەلە جاتقان جاڭا جىلمەن قۇتتىقتادى.