Redakciya swrauına bergen jauabında Bas prokuratura Qañtarda ayausız azaptalğan Qırğız azamattarınıñ isi tağı uaqıtşa toqtağanın habarladı.

Qañtar ayınıñ basında QT redakciyası Bas prokuraturağa arnayı prokurorlar men Sıbaylas jemqorlıqqa qarsı is-qimıl agenttiginiñ birlese tergedi delingen qırğızstandıq Çolponbek Sıdıkov pen Vikram Ruzahunovtı azaptau isteri jöninde swrau joldağan. Redakciyağa BP qaramağındağı Qılmıstıq qudalau qızmetiniñ basşısınıñ orınbasarı Eldos Qilımjanovtıñ atınan jauap keldi.

Resmi hatta «Jürgizilgen tergeumen Ruzahunov jäne Sıdıkovqa qatıstı azaptau is- äreketterin qoldanğan küdikti twlğalar anıqtalmadı. Sotqa deĭingi tergep-tekseru merzimi küdikti twlğalardıñ anıqtalmauına baĭlanıstı üzildi» delingen.

2022 jılı Qañtar oqiğası kezinde qwqıq qorğau jäne küştik qwrılım ökilderi qırğız azamattarı Vikram Ruzahunov pen Çolpanbek Sıdıqovtı ayausız azaptağanı habarlanğan. Tergeu kezinde rwqsat etilmegen ädisterdi qoldana otırıp, memlekettik iri BAQ arqılı jalğan körsetpe beruge itermelegeni qoğamdıq rezonans tudırğan.  Qırğız kompozitorı Ruzahunov resmi Bişkek pen qoğam aralasuımen bosağan. Qırğızstanda oğan auruhanada operaciya jasaldı. Muzıkanttıñ qabırğaları sınıp, miı şayqalğan. Qazaqstan biligi «Azaptau» babımen qılmıstıq is qozğap, keyin uaqıtşa üzilgen. Küzde tergeu amalı jandanıp edi. Sazger özin wrıp-soqqan onnan asa policeydi tanığan. Sot medicina saraptamasımen densaulığına auır zaqım kelgeni anıqtaldı.

Azattıq radiosı qırğız qızmetiniñ osığan deyingi aqparatına qarağanda, Sıdıqovtıñ  da miı şayqalıp, altı qabırğası sınğan, eki tobığı şıqqan. Bwl is jöninde de is qozğalğan. Qırğız qwqıq qorğauşılar qauımdastığı Çolpanbektiñ körgen azabın «qatıgezdiktiñ eñ auır türi» retinde bağalağan.

Qazaqstan Antikor törağası Oljas Bektenov azaptau qılmısın anıqtauğa «eñ täjiribeli tergeuşiler» tartılğanın aytqan. Biraq Istambwl hattaması tolığımen jüzege aspağan azaptau isterinde jauapqa tartılğan adam az. Qwqıq qorğauşılar dereginşe, Qandı Qañtarda wstalğan 10 mıñ adamnıñ 70 payızı azaptalğan.

The Qazaq Times