رەداكتسيا سۇراۋىنا بەرگەن جاۋابىندا باس پروكۋراتۋرا قاڭتاردا اياۋسىز ازاپتالعان قىرعىز ازاماتتارىنىڭ ءىسى تاعى ۋاقىتشا توقتاعانىن حابارلادى.

قاڭتار ايىنىڭ باسىندا QT رەداكتسياسى باس پروكۋراتۋراعا ارنايى پروكۋرورلار مەن سىبايلاس جەمقورلىققا قارسى ءىس-قيمىل اگەنتتىگىنىڭ بىرلەسە تەرگەدى دەلىنگەن قىرعىزستاندىق چولپونبەك سىدىكوۆ پەن ۆيكرام رۋزاحۋنوۆتى ازاپتاۋ ىستەرى جونىندە سۇراۋ جولداعان. رەداكتسياعا بپ قاراماعىنداعى قىلمىستىق قۋدالاۋ قىزمەتىنىڭ باسشىسىنىڭ ورىنباسارى ەلدوس قيلىمجانوۆتىڭ اتىنان جاۋاپ كەلدى.

رەسمي حاتتا «جۇرگىزىلگەن تەرگەۋمەن رۋزاحۋنوۆ جانە سىدىكوۆقا قاتىستى ازاپتاۋ ءىس- ارەكەتتەرىن قولدانعان كۇدىكتى تۇلعالار انىقتالمادى. سوتقا دەي̆ىنگى تەرگەپ-تەكسەرۋ مەرزىمى كۇدىكتى تۇلعالاردىڭ انىقتالماۋىنا باي̆لانىستى ءۇزىلدى» دەلىنگەن.

2022 جىلى قاڭتار وقيعاسى كەزىندە قۇقىق قورعاۋ جانە كۇشتىك قۇرىلىم وكىلدەرى قىرعىز ازاماتتارى ۆيكرام رۋزاحۋنوۆ پەن چولپانبەك سىدىقوۆتى اياۋسىز ازاپتاعانى حابارلانعان. تەرگەۋ كەزىندە رۇقسات ەتىلمەگەن ادىستەردى قولدانا وتىرىپ، مەملەكەتتىك ءىرى باق ارقىلى جالعان كورسەتپە بەرۋگە يتەرمەلەگەنى قوعامدىق رەزونانس تۋدىرعان.  قىرعىز كومپوزيتورى رۋزاحۋنوۆ رەسمي بىشكەك پەن قوعام ارالاسۋىمەن بوساعان. قىرعىزستاندا وعان اۋرۋحانادا وپەراتسيا جاسالدى. مۋزىكانتتىڭ قابىرعالارى سىنىپ، ميى شايقالعان. قازاقستان بيلىگى «ازاپتاۋ» بابىمەن قىلمىستىق ءىس قوزعاپ، كەيىن ۋاقىتشا ۇزىلگەن. كۇزدە تەرگەۋ امالى جاندانىپ ەدى. سازگەر ءوزىن ۇرىپ-سوققان وننان اسا پوليتسەيدى تانىعان. سوت مەديتسينا ساراپتاماسىمەن دەنساۋلىعىنا اۋىر زاقىم كەلگەنى انىقتالدى.

ازاتتىق راديوسى قىرعىز قىزمەتىنىڭ وسىعان دەيىنگى اقپاراتىنا قاراعاندا، سىدىقوۆتىڭ  دا ميى شايقالىپ، التى قابىرعاسى سىنعان، ەكى توبىعى شىققان. بۇل ءىس جونىندە دە ءىس قوزعالعان. قىرعىز قۇقىق قورعاۋشىلار قاۋىمداستىعى چولپانبەكتىڭ كورگەن ازابىن «قاتىگەزدىكتىڭ ەڭ اۋىر ءتۇرى» رەتىندە باعالاعان.

قازاقستان انتيكور توراعاسى ولجاس بەكتەنوۆ ازاپتاۋ قىلمىسىن انىقتاۋعا «ەڭ تاجىريبەلى تەرگەۋشىلەر» تارتىلعانىن ايتقان. بىراق ىستامبۇل حاتتاماسى تولىعىمەن جۇزەگە اسپاعان ازاپتاۋ ىستەرىندە جاۋاپقا تارتىلعان ادام از. قۇقىق قورعاۋشىلار دەرەگىنشە، قاندى قاڭتاردا ۇستالعان 10 مىڭ ادامنىڭ 70 پايىزى ازاپتالعان.

The Qazaq Times