Sud'ya Bağdat Törebekwlı. Foto: QT

Tarazda Qandı Qañtar oqiğası boyınşa ayıptalğan 9 adamnıñ sotı jalğasuda (küdiktilerdiñ beseui oqqa wşıp, qaza tapqandar). 18 qañtarda ötui tiis sot otırısın sud'ya Bağdat Törebekwlı keyinge qaldırdı. Ol procestiñ keyinge qaluın tergeu izolyatorında otırğan özge üş küdiktini alıp keletin konvoydıñ Qırğızstanğa is-saparmen ketuimen tüsindirdi. Sottaluşılardıñ tuıstarı bwnı sotqa jurnalisterdiñ keluimen baylanıstırdı. Olar Tarazda bir ğana konvoy jetkiliksiz degenge senbeydi. 

Qañtarda oqqa wşıp, qaza tauıp, keyinnen üstinen QR QK 272 babınıñ 2 tarmağı boyınşa is qozğalğan Nwrswltan Quatbaevtıñ äkesi Baqıtjan Şıñğısbekov sud'yanıñ sottı keyinge qaldıruın bılay dep tüsindiredi:

 – Sot «bizdiñ konvoylar Qırğızstanğa etappen adamdardı alıp ketti. Sol sebepti bizdiñ balalarmen birge sottalıp jatqan üş adamdı alıp kele almaydı» dep, isti keyinge qaldırdı. Meyli, on konvoy ketsin. Biraq, Tarazda 10-aq konvoy emes şığar. Konvoylar köp. Men oylaymın, bwlar jurnalisterdiñ kele jatqanın bildi. Qazir isti zerdeleu jürip jatır. Onı biz aşıq talqılap jatırmız. Sonı bwlar jurnalister, halıq bilmesin dep keyinge qaldırıp qoydı – dedi Şıñğısbekov.

Onıñ sözinşe, iste şikilikter öte köp. Kuä bolıp kelip jatqan adamdar sot zalında kuälik beru kezinde azaptalğanın aşıq aytqan. Biraq sud'ya olardıñ mälimdemesi men ötiniş-arızına nazar audarmağan.

– Kuäger bolıp kelip jatqan balalardıñ barlığı Qañtarda alañda maşinanıñ üstine şığıp, tu wstap jürgender. Olardı biz videodan kördik. Älibek Jandos degen kuäger sotqa arız jazıp alıp kelip, «sud'ya mırza, meni Qañtar kezinde azaptadı, osıdan keyin men amal joq ayttım. Meni advokatımnıñ közinşe tergeuşiler tepkilep jatqanda ol eşnärse istegen joq» dedi. Twrısbek degen kuäger meniñ balamdı körmegenin ayttı. Ol da qwjattarğa qoldı azaptau kezinde qoyğanın mälimdedi. Üşinşi kuä bolıp Mırzaliev degen bala keldi. Ol ayağında äli künge deyin oq barın, azaptağan soñ eriksiz kuä bolğanın aşıq ayttı. Sud'ya ündegen joq. Swraq ta qoymadı. Basın izep otırdı, – dedi ol.

Baqıtjan Şıñğısbekov Käuetov esimdi kuäniñ sottan şıqqan soñ Keñes Erniyaz degen tergeuşiniñ maşinasına minip ketkenin körgen. Ol keybir kuägerlerdi tergeuşiler arnayı dayındağan dep küdiktenedi.

– Käuetov degen kuäger bar. Biz ol sottan şığıp, joldıñ arğı jağına ötip, Qañtar oqiğası boyınşa Tarazğa Şu qalasınan arnayı kelgen Keñes Erniyaz degen tergeuşiniñ maşinasına mingenin kördik. Ekeui birge ketti. Biz olardı suretke de tüsirip aldıq. YAğni, ol Keñes Erniyazdıñ arnayı dayındağan kuäsi dep naqtı ayta alamız. Oğan közimiz jetti, – dedi Şıñğısbekov.

Resmi derek boyınşa, Qandı Qañtar oqiğası kezinde Tarazda 15 adam qaza tapqan. Onıñ işinde Rays Rısbekov, Erjan Bayjanov, Nwrswltan Quatbaev, Toqtar Oşaqbay jäne Isatay Donbaevtıñ üstinen qılmıstıq is qozğalğan. Olardıñ tuıstarı tağılğan ayıppen kelispeydi. Jaqındarın jazıqsız atıp öltirip, alañğa jaqın jerge äkelip tastağan dep esepteydi.

Qandı Qañtar kezinde Qazaqstan boyınşa 238 adam qaza tapqan. 10 mıñnan astam adam wstalıp, onıñ 70 payızı azaptalğan. Qazir «adam ölimi» jäne «azaptau» boyınşa isterdiñ basım köpşiligi toqtatılğan.