Foto: inform.kz

Wlttıq qauipsizdik komitetiniñ habarlauınşa, jemqorlıqpen küres jönindegi agenttik törağasınıñ bwrınğı orınbasarı Maqsat Qojabaev wstaldı. Bwl turalı Ortalıq Aziya jañalıqtar qızmeti jazdı.

Komitettiñ baspasöz qızmetiniñ mälimetinşe, Qojabaev 2023 jılğı 9 qañtarda jemqorlıq jasadı degen küdikpen wstaldı. Komitet istiñ basqa da jay-japsarın habarlamadı. Tergeu jürip jatır, dep mälimdedi WQK.

Maqsat Qojabaev Qazaqstan jemqorlıqpen küres jönindegi agenttik törağasınıñ orınbasarı qızmetine 2021 jılğı şildede prezident jarlığımen tağayındalğan. Bıltır säuirde Qodabaev agenttik törağasınıñ orınbasarı qızmetinen bosatılğan. Bwğan deyin ol birneşe jıl boyı Şımkent qalası prokurorı, Jambıl oblısı prokurorınıñ orınbasarı bolıp istegen.

200-den astam adamnıñ ömirin jalmağan Qandı qañtar oqiğasınan soñ Qazaqstan biligi aktivterdi qaytaru nemese ekonomikanıñ türli salalarındağı monopoliyanı joyu jöninde jii mälimdep jür. Sarapşılardıñ birqatarı menşik bölisi bastaldı dep topşılaydı. 2022 jılğı Qañtar oqiğasınan soñ birneşe şeneunik wstalğanın meñzegen baqılauşılar memleket basşısınıñ aynalasındağılar men bwrınğı prezident Nwrswltan Nazarbaev adamdarı arasında bilikke talas jürip jatır dep boljadı. Qasım-Jomart Toqaev ta, Nwrswltan Nazarbaev ta mwnday boljamdı joqqa şığarğan.

Bir jılğa juıq uaqıt bwrın qızmetten alınğan bwrınğı qorğanıs ministri Mwrat Bektanov Qazaqstan qalalarındağı qaqtığıstar kezinde äreketsizdik tanıttı degen ayıppen wstaldı. Biıl qañtarda bas prokuror Berik Asılov eks-ministr Mwrat Bektanov 2022 jılğı qañtar oqiğası kezinde zañsız bwyrıqtar berip, äskeri strategiyalıq nısandardı qorğausız qaldırdı dep mälimdegen.

Eks-prezidenttiñ jaqtası sanalatın Kärim Mäsimov qañtar oqiğası kezinde WQK basşısı qızmetinen alınıp, tergeu izolyatorına qamaldı. Oğan memleketti sattı, bilikti basıp aluğa talpındı degen ayıptar tağıldı. Onıñ bwrınğı üş orınbasarı wstaldı. Kärim Mäsimovtiñ qılmıstıq isine "qwpiya" möri basılğan.