جەمقورلىقپەن كۇرەس جونىندەگى اگەنتتىكتىڭ بۇرىنعى ورىنباسارى ۇستالدى

كوميتەتتىڭ ءباسپاسوز قىزمەتىنىڭ مالىمەتىنشە، قوجاباەۆ 2023 جىلعى 9 قاڭتاردا جەمقورلىق جاسادى دەگەن كۇدىكپەن ۇستالدى. كوميتەت ءىستىڭ باسقا دا جاي-جاپسارىن حابارلامادى. تەرگەۋ ءجۇرىپ جاتىر، دەپ مالىمدەدى ۇقك.

ماقسات قوجاباەۆ قازاقستان جەمقورلىقپەن كۇرەس جونىندەگى اگەنتتىك توراعاسىنىڭ ورىنباسارى قىزمەتىنە 2021 جىلعى شىلدەدە پرەزيدەنت جارلىعىمەن تاعايىندالعان. بىلتىر ساۋىردە قوداباەۆ اگەنتتىك توراعاسىنىڭ ورىنباسارى قىزمەتىنەن بوساتىلعان. بۇعان دەيىن ول بىرنەشە جىل بويى شىمكەنت قالاسى پروكۋرورى، جامبىل وبلىسى پروكۋرورىنىڭ ورىنباسارى بولىپ ىستەگەن.

200-دەن استام ادامنىڭ ءومىرىن جالماعان قاندى قاڭتار وقيعاسىنان سوڭ قازاقستان بيلىگى اكتيۆتەردى قايتارۋ نەمەسە ەكونوميكانىڭ ءتۇرلى سالالارىنداعى مونوپوليانى جويۋ جونىندە ءجيى مالىمدەپ ءجۇر. ساراپشىلاردىڭ بىرقاتارى مەنشىك ءبولىسى باستالدى دەپ توپشىلايدى. 2022 جىلعى قاڭتار وقيعاسىنان سوڭ بىرنەشە شەنەۋنىك ۇستالعانىن مەڭزەگەن باقىلاۋشىلار مەملەكەت باسشىسىنىڭ اينالاسىنداعىلار مەن بۇرىنعى پرەزيدەنت نۇرسۇلتان نازارباەۆ ادامدارى اراسىندا بيلىككە تالاس ءجۇرىپ جاتىر دەپ بولجادى. قاسىم-جومارت توقاەۆ تا، نۇرسۇلتان نازارباەۆ تا مۇنداي بولجامدى جوققا شىعارعان.

ءبىر جىلعا جۋىق ۋاقىت بۇرىن قىزمەتتەن الىنعان بۇرىنعى قورعانىس ءمينيسترى مۇرات بەكتانوۆ قازاقستان قالالارىنداعى قاقتىعىستار كەزىندە ارەكەتسىزدىك تانىتتى دەگەن ايىپپەن ۇستالدى. بيىل قاڭتاردا باس پروكۋرور بەرىك اسىلوۆ ەكس-مينيستر مۇرات بەكتانوۆ 2022 جىلعى قاڭتار وقيعاسى كەزىندە زاڭسىز بۇيرىقتار بەرىپ، اسكەري ستراتەگيالىق نىسانداردى قورعاۋسىز قالدىردى دەپ مالىمدەگەن.

ەكس-پرەزيدەنتتىڭ جاقتاسى سانالاتىن كارىم ءماسىموۆ قاڭتار وقيعاسى كەزىندە ۇقك باسشىسى قىزمەتىنەن الىنىپ، تەرگەۋ يزولياتورىنا قامالدى. وعان مەملەكەتتى ساتتى، بيلىكتى باسىپ الۋعا تالپىندى دەگەن ايىپتار تاعىلدى. ونىڭ بۇرىنعى ءۇش ورىنباسارى ۇستالدى. كارىم ءماسىموۆتىڭ قىلمىستىق ىسىنە "قۇپيا" ءمورى باسىلعان.