Almatı oblısı Talğar audanı, Talğar qalasındağı qwrılısı endi ğana bitken №25 mekteptiñ aynalasındağı dau-damay örşip baradı. Ötkende ğana şıqqan qwrlıs sapası turalı şu basılmay jatıp endi etnos aralıq dauğa aynalğalı twrğanday. Bwl jağdaydı tilşimiz barıp tüsirp qayttı.

Mektep jarğısında «Oqıtu tili – qazaq tildi» dep körsetilgen mektep ayaq astınan audandıq bilim basqarmasınıñ şeşimimen aralas mektep bolıp şığa kelgen. Bwğan narazı bolğan jwrt 25 tamızda qoğam belsendilerimen bir top jurnalisti şaqırıp zar-mwñdarın ayttı.

Oqu mausımına 5 kün qalğanda balasın qayda bererin bilmey eki ortada sandalıp qalğan jwrtpen, qazaq tildi mektepterdiñ müşkil halın qalay jaqsartamız dep jan wşırıp jürgen til janaşırlarınıñ talap tilegin tıñdauğa kelgen «estitin memlekettiñ» jañadan qwrılğan oblısınıñ äkimdiginen arnayı baspasöz qızmetiniñ jetekşisi Ğalımwrat Jükel men bilim basqarması basşısınıñ orınbasarı Gülsara Isağwlova da mektep töñiregindegi şudı öz közderimen kördi.

Alayda, özine qarastı aumaqta tuındap jatqan mäseleni tıñdauğa audan äkimi de, tipten osı mäselege belsene atsalısadı dep sanalatın işki sayasat mamandarı da körinbedi. Al balaların osı meketepke äkelip oqıtqısı kelgen ata-analar orıs-qazaq bolıp kerkildesip, jağa jırtısığa deyin tayap qaldı.

Bwnda qazaq balaları sanı tolmağandıqtan aralas mektep boluğa mäjbür boldıq degen audandıq bilim basqarmasınıñ sözine 10 aydan beri osı ispen aynalısıp jürgen Kämnwr Tälim kelispeydi.

Bwl mäseleniñ tuındauına birden bir osı audannıñ äkimi Qaydar Äbdihanov pen audandıq bilim bölimi mekemesiniñ basşısı Qarlığa Sadvakasovanı sebepker dep sanaydı.

Özi qazaq tildi ata-analardan 890 balanıñ ötinişin äkelip mektepke ötkizgenin alayda bwndağılardıñ onı qasaqana jasırıp mekteptiñ qazaq tildi boluına qarsı jwmıs jasap otır dep esepteydi.

Al oblıstan kelgen bilim basqarmasınıñ basşısınıñ orınbasarı Gülsara hanım Talğar qalasınan 1000 qazaq balasın tauıp osı mektepke alıp kelseñder onda bwl mektep qazaq tilinde oqıtatın boladı dep söz berdi.

Büginge deyin audandıq bilim basqarmasınıñ basşısı ädeyin qazaq balalarınıñ qwjattarın qabıldatpadı degen pikirmen kelispegen Sadvakasova hanım öziniñ oquşı qabıldauğa beretin talondı toqtatıp tastağanın efirde aytqanımen artınşa "olay aytpadım" dep sözinen aynıp qaldı. Arı qaray da qazaqşa oqitın 1000 bala jinalsa mektep qazaq tildi boladı degen Gülsara hanımnıñ uağdasına "onda orıstarımdı qayda jiberem" degen uayımın da aytıp qaldı.

Tüs qayta Talğar qalasındağı dämhanalardıñ birinen oqiyatta äkim mırzanıñ köligin körip qalğan jurnalisterge äkimniñ orınbasarı Orazhan Kaspakbaev äkim Äbdihanov bwl jerde joq dep jaltarğanımen äkim mırza sırtqa şığıp jurnalisterdiñ swrağına jauap beruine tura keldi. Jwmıs uaqıtında dämhanada jürgenin öziniñ qarbalas jwmıspen tüski asqa keşigip şıqqanımen tüsindirgen Qaydar mırza aralas mektep boluına öziniñ eşqanday qatısınıñ joq ekendigin, şeşimdi oblıstıq bilim basqarması şığarıp otırğanın, alayda özine kelip tüsken aqparatqa süyene otırıp obl äkimine öziniñ aralas mektep bolsın degen wsınısın bergenin ayttı. Aytıp twrğan sandarınan şatasa bastağan Äbdihanov mırza söz arasında mekteptiñ aralas boluın «bir top orıs äyeldiñ şulauına» baylanıstı ekenin aytıp qaldı.

PS. «Estitin memlekettiñ» jaña qwrılğan oblsına qarastı Talğar audanındağı jwrttıñ mwñ-zarın tıñdauğa barğan bir top jurnalist №25 mekteptiñ äuelgi qararındağı «Oqıtu tili – qazaq tili» statusın qaytaru üşin oblıstıq bilim basqarmasınıñ orınbasarı Gülsara hanım men audan äkimi Äbdihanovqa qazaqşa oqığısı keletin 1000 balağa qarız bolıp qayttı.

N.Baytwrsın.

Almatı obl. Talğar audanı.

“The Qazaq Times”