Bügin 31 mamır. Quğın-sürgin qwrbandarın eske alatın tarihi kün. Qazaq tarihındağı ornı tolmas joğaltulardıñ işindegi aştıq pen qatar atalatın qaralı kün. Sonau ötken ğasırdıñ qoynında qalıp bara jatsa da, kün ötken sayın jaralı ruhımızdıñ jadında jañğıra beredi.
Milliondağan quğın-sürginge wşırağan halıqtıñ işinde qazaqtıñ joğaltqanı köp. Aşarşılıqtı aytpağanda 100 mıñ adam osı quğın-sürginniñ qwrbanı boldı. Totalitarlıq jüyeniñ elimizge salğan ziyanın aytıp jetkizu mümkin emes. 20 mıñ adam atıldı, olar qazaqtıñ birtuar azamattarı edi. Olardıñ işinde Ä.Bökeyhan, A.Baytwrsınwlı, M.Tınışbaev, M.Dulatwlı, T.Rısqwlov, M.Jwmabaev, S.Seyfullin, İ.Jansügirov, B.Maylin, S.Asfendiyarov siyaqtı memleket jäne qoğam qayratkerleri, ağartuşılar, wlt janaşırları boldı.
Sonday-aq, özge jerden sürgindelip kelgen basqa wlttar da köp boldı, osılayşa köp wlt pen wlıs twratın elge aynaldıq. Qazaq jeri özgeler üşin jaylı mekenge aynaldı. Itjekkenge aydalıp, qanşa qazaqtıñ süyegi şaşılıp dalada qaldı. Qandı qasaptıñ qasiretin tartqan el bizdey-aq bolar. Ötkennen sabaq alıp, özgeniñ bodanınan arılatın künge jetuge haqımız bar. Ötkenge salauat, tirige bereke kerek.