Dabıralı oqiğalarına qiınşılığı qatar kelgen, zañdılığına say quanışı da, jwbanışı da qatar jürgen 2021 jıldı tarihtıñ enşisine wzatıp salğalı twrmız. Ötkeli twrğan jılda älemde jäne elimizde eleuli oqiğalar, türli özgerister az bolğan joq. Uaqıttıñ tınımsız döñgelegi onıñ bärin "ÖTKEN"-ge aynaldırdı. Endi mine, aldımızda ümit artqan tağı bir jıl kele jatır!

Qazaqtıñ eski sözinde "eski jıl esirke, jaña jıl jarılqa" dep jatadı. Ol da bolsa eski jılğa ökpe artpaytın, jaña jılğa sın taqpaytın halıq dünietanımınıñ sözge aynalğan forması bolsa kerek.  Jalpı jahandıq bolmıstan alıp qarağanda, soñğı birneşe jılda älemdik ekonomikalıq damu twralap, pandemiya qırsığı şırmap, köptegen elderde äleumettik jäne sayasi dağdarıstar bolğanı belgili. Bir qarağanda älem tüpsiz şıñırauğa bet alğanday köringenimen, şın mänisinde adamzat qoğamı mwnday sın-sınaqtan bwğan deyin de talay ret ötken, aldada talay sınğa döp keleri sözssiz. Sanalı tirşilik bolaşağın qalay elestetedi, qazirgi sındarlı kezeñ soğan baylanıstıday. Är jaña jılğa izgi ümitpen qaraytınımız sekildi, bolaşaqqa da jarqın ümitpen köz tastaymız.

Osığan oray, barşa otandastarımızdı, alıs-juıq şeteldegi qandastarımızdı, barşa adamzat balasın kele jatqan jaña jılımen şın jürekten qwttıqtaymız! Jaña jıl jaqsılığımen, igiligimen, qayırımen kelsin! Älemde bolıp jatqan qiınşılıqtar, qayşılıqtar, dağdarıstar soğıssız, beybit şeşimin tauıp, barşamızdıñ ortaq älemimiz güldene bersin! Jaratuşı sın sağattarda adamzat balasınıñ jüregindegi izgilik, meyirim, mahabbat sezimderin ala körmesin! Elimiz aman, jwrtımız tınış bolıp, Barıs jıl baqıt äkelsin!

The Qazaq Times