Körneki suret. Aqılı avtojolğa kireberistegi tölem beketi. Foto: Total.kz

Qazaqstanda respublikalıq mañızı bar jeti birdey avtojoldıñ jwmısı aqılı rejimge köşti.

Düysenbiden bastap wzındığı 1,8 mıñ şaqırım bolatın tört jolaqtı qozğalısı bar birinşi sanattağı «astana – Pavlodar»; «Qapşağay – Taldıqorğan»; «Taraz-Qaynar»; «Şımkent-Taraz»; «Şımkent-Qızılorda»; «Şımkent-Taşkent»; «Şuçinsk-Kökşetau» uçaskeleri aqılı boldı.

Esteriñizge sala keteyik, joldardı aqılı etu bastaması mausım ayında köterilgen edi. Biraq kölik jürgizuşiler bwğan narazılıq tanıtıp, äueli joldıñ sapasın jaqsartudı talap etken.

Transport dälizine jauaptı «Qazavtojol» men Industriya jäne infraqwrılımdıq damu ministrligi İ sanattağı joldardıñ tarifteri 2013 jılğı mölşerde qalatının aytıp keledi.

Osılayşa,

  • jeñil avtokölikter üşin wzındığı 441,7 şaqırım bolatın Şımkent-Qızılorda jolımen jüru qwnı 420 teñge, avtobustar men jük kölikteri üşin — jolauşılar sanı men jük kölemine baylanıstı 2170-10 930 teñge aralığında belgilendi;
  • 375 km bolatın astana-Pavlodar bağıtında jeñil kölikke 380 teñge jäne avtobustar men jük köligine 1870-9380 teñgege deyin boladı;
  • Taraz-Qaynar (237,5 km): jeñil kölik üşin 230 teñge jäne avtobustar men jük köligi üşin 1190-5990 teñge;
  • Qapşağay-Taldıqorğan (186 km): jeñil avtokölikter üşin 190 teñge, avtobustar men jük kölikteri üşin 930-4660 teñgege deyin;
  • Şımkent-Taraz (100,3 km): jeñil avtokölikter üşin 70 teñge, jük kölikteri men avtobustar üşin 350-den 1750 teñge aralığında;
  • Şımkent-Özbekstanmen şekara (106,4 km): jeñil avtomobil'ge 90 teñge, jük kölikteri men avtobustardıñ jürgizuşileri üşin 400-2100 teñge;
  • Şuçinsk-Kökşetau (60,7 km): avtokölikter üşin 50 teñge, jük kölikteri men avtobustar üşin 330-1600 teñge.

Qazir ekinşi jäne üşinşi sanattağı joldardıñ bağası qarastırılıp jatır. Aldağı uaqıtta olar da birinşi sanattan edäuir tömen bağamen aqılı türge auıstıru közdelgen.

Ministrlik mälimetinşe, biıl toğız ayda aqılı joldan memleket qazınasına 5,75 mlrd teñge qarjı tüsken. Eñ köbi astana-Temirtau bağıtınan – 1,85 mlrd teñge. Astana-Şuçinsk (1,65 mlrd), Almatı-Qorğas (1,11 mlrd), Almatı-Qapşağay (1,13 mlrd teñge) tüsim bolğan. Ükimet bwl qarjığa joldıñ tehnikalıq sapasın arttırıp, kütip-wstauına jwmsauğa uäde bergen. Dese de jürgizuşilerdiñ bir böligi bwğan kümänmen qaraydı.

The Qazaq Times