كورنەكى سۋرەت. اقىلى اۆتوجولعا كىرەبەرىستەگى تولەم بەكەتى. فوتو: تotal.kz

قازاقستاندا رەسپۋبليكالىق ماڭىزى بار جەتى بىردەي اۆتوجولدىڭ جۇمىسى اقىلى رەجيمگە كوشتى.

دۇيسەنبىدەن باستاپ ۇزىندىعى 1,8 مىڭ شاقىرىم بولاتىن ءتورت جولاقتى قوزعالىسى بار ءبىرىنشى ساناتتاعى «استانا – پاۆلودار»; «قاپشاعاي – تالدىقورعان»; «تاراز-قاينار»; «شىمكەنت-تاراز»; «شىمكەنت-قىزىلوردا»; «شىمكەنت-تاشكەنت»; «ششۋچينسك-كوكشەتاۋ» ۋچاسكەلەرى اقىلى بولدى.

ەستەرىڭىزگە سالا كەتەيىك، جولداردى اقىلى ەتۋ باستاماسى ماۋسىم ايىندا كوتەرىلگەن ەدى. بىراق كولىك جۇرگىزۋشىلەر بۇعان نارازىلىق تانىتىپ، اۋەلى جولدىڭ ساپاسىن جاقسارتۋدى تالاپ ەتكەن.

ترانسپورت دالىزىنە جاۋاپتى «قازاۆتوجول» مەن يندۋستريا جانە ينفراقۇرىلىمدىق دامۋ مينيسترلىگى ءى ساناتتاعى جولداردىڭ تاريفتەرى 2013 جىلعى مولشەردە قالاتىنىن ايتىپ كەلەدى.

وسىلايشا،

  • جەڭىل اۆتوكولىكتەر ءۇشىن ۇزىندىعى 441,7 شاقىرىم بولاتىن شىمكەنت-قىزىلوردا جولىمەن ءجۇرۋ قۇنى 420 تەڭگە، اۆتوبۋستار مەن جۇك كولىكتەرى ءۇشىن — جولاۋشىلار سانى مەن جۇك كولەمىنە بايلانىستى 2170-10 930 تەڭگە ارالىعىندا بەلگىلەندى;
  • 375 كم بولاتىن استانا-پاۆلودار باعىتىندا جەڭىل كولىككە 380 تەڭگە جانە اۆتوبۋستار مەن جۇك كولىگىنە 1870-9380 تەڭگەگە دەيىن بولادى;
  • تاراز-قاينار (237,5 كم): جەڭىل كولىك ءۇشىن 230 تەڭگە جانە اۆتوبۋستار مەن جۇك كولىگى ءۇشىن 1190-5990 تەڭگە;
  • قاپشاعاي-تالدىقورعان (186 كم): جەڭىل اۆتوكولىكتەر ءۇشىن 190 تەڭگە، اۆتوبۋستار مەن جۇك كولىكتەرى ءۇشىن 930-4660 تەڭگەگە دەيىن;
  • شىمكەنت-تاراز (100,3 كم): جەڭىل اۆتوكولىكتەر ءۇشىن 70 تەڭگە، جۇك كولىكتەرى مەن اۆتوبۋستار ءۇشىن 350-دەن 1750 تەڭگە ارالىعىندا;
  • شىمكەنت-وزبەكستانمەن شەكارا (106,4 كم): جەڭىل اۆتوموبيلگە 90 تەڭگە، جۇك كولىكتەرى مەن اۆتوبۋستاردىڭ جۇرگىزۋشىلەرى ءۇشىن 400-2100 تەڭگە;
  • ششۋچينسك-كوكشەتاۋ (60,7 كم): اۆتوكولىكتەر ءۇشىن 50 تەڭگە، جۇك كولىكتەرى مەن اۆتوبۋستار ءۇشىن 330-1600 تەڭگە.

قازىر ەكىنشى جانە ءۇشىنشى ساناتتاعى جولداردىڭ باعاسى قاراستىرىلىپ جاتىر. الداعى ۋاقىتتا ولار دا ءبىرىنشى ساناتتان ەداۋىر تومەن باعامەن اقىلى تۇرگە اۋىستىرۋ كوزدەلگەن.

مينيسترلىك مالىمەتىنشە، بيىل توعىز ايدا اقىلى جولدان مەملەكەت قازىناسىنا 5,75 ملرد تەڭگە قارجى تۇسكەن. ەڭ كوبى استانا-تەمىرتاۋ باعىتىنان – 1,85 ملرد تەڭگە. استانا-ششۋچينسك (1,65 ملرد), الماتى-قورعاس (1,11 ملرد), الماتى-قاپشاعاي (1,13 ملرد تەڭگە) ءتۇسىم بولعان. ۇكىمەت بۇل قارجىعا جولدىڭ تەحنيكالىق ساپاسىن ارتتىرىپ، كۇتىپ-ۇستاۋىنا جۇمساۋعا ۋادە بەرگەن. دەسە دە جۇرگىزۋشىلەردىڭ ءبىر بولىگى بۇعان كۇمانمەن قارايدى.

The Qazaq Times