Facebook «ەستۋشى ۇكىمەتتىڭ» مالىمدەمەسىن تەرىستەدى، بالاەۆا ايماقتاعى وكىلمەن كەلىسكەنىن ايتادى

كەشە، قاراشانىڭ 1-ءى قازاقستاننىڭ اقپارات جانە قوعامدىق دامۋ مينيسترلىگى «زيانكەس ءارى زاڭسىز كونتەنتتى جويۋ» ءۇشىن Facebook-ءتىڭ ىشكى جۇيەسىنە ەكسكليۋزيۆ قولجەتىمدىلىك العانىن حابارلاپ ەدى. بۇگىن Facebook جەلىسىنىڭ ازيا-تىنىق مۇحيتى ايماعىنا جاۋاپتى وكىلى قازاقستان ۇكىمەتىمەن ورتاق مالىمدەمە جاساعانىن تەرىستەگەن بويدا اقپارات ءمينيسترى ايدا بالاەۆا تەحكومپانيانىڭ گونكونگ وكىلدىگىمەن كەلىسىلگەنىن جازدى.

حالىقارالىق Reuters باسىلىمىنىڭ حابارلاۋىنشا، اتالعان تانىمال جەلىگە يەلىك ەتەتىن Meta Platforms كومپانياسىنىڭ ازيا-تىنىق مۇحيتى ايماعى بويىنشا كوممۋنيكاتسيا ءبولىمىنىڭ ديرەكتورى بەن ماككوناحي بىرلەسكەن مالىمدەمە جاساسپاعانىن جەتكىزگەن.

«بىرىنشىدەن، ءبىز قازاق ۇكىمەتىمەن ورتاق مالىمدەمە شىعارعانىمىز جوق. قازاق ۇكىمەتى بيلىكتىڭ جەرگىلىكتى زاڭدى بۇزاتىن كونتەنتتەرگە تىيىم سالۋ تۋرالى وتىنىشتەرى بويىنشا وتكەن عالامدىق تالقىلاۋ نەگىزىندە ءوزى مالىمدەمە جاسادى» دەپ جازدى.

بارلىق اقپارات قۇرالدارى جاپپاي جازعان تەرىستەۋ مالىمدەمەسىنەن كەيىن تۇسكە قاراي اقپارات ءمينيسترى ايدا بالاەۆا Facebook جەلىسىندەگى پاراقشاسىندا ۆەدومستۆو اتىنان ارنايى جازبا جاريالادى.

«اقپارات جانە قوعامدىق دامۋ مينيسترلىگى نەگىزگى كەلىسسوزدەردى گونكونگ قالاسىندا ورنالاسقان قىتاي، موڭعوليا جانە ورتالىق ازيا ءوڭىرى بويىنشا «Meta» («Facebook») كومپانياسىنىڭ وڭىرلىك وفيسىمەن جۇرگىزدى. 1 قاراشادا جاريالانعان بىرىككەن مالىمدەمەنىڭ ءماتىنى مەن ونىڭ باق-دا جاريالانۋى اتالعان ايماقتىق كەڭسەنىڭ باسشىلىعىمەن تولىقتاي كەلىسىلگەن بولاتىن» دەدى.

وسىجان ءبىر كۇن الدىن، دۇيسەنبىدە مينيسترلىكتىڭ رەسمي سايتى «قازاقستان ۇكىمەتىنە اقپاراتتىق كەڭىستىكتىڭ قاۋىپسىزدىگىن ارتتىرۋ ماسەلەسىن شەشۋگە كومەك كورسەتۋ ءۇشىن Facebook قازاقستانعا ىشكى «كونتەنتتى حابارلاۋ جۇيەسىنە» («Content Reporting System» – CRS) تىكەلەي ەكسكليۋزيۆتى قولجەتىمدىلىك بەردى» دەپ جازعان.

اقپارات جانە قوعامدىق دامۋ مينيتسرلىگىنىڭ وڭىرلىك كەڭسە باسشىلىعىمەن جاسالعان كەلىسىمدى الپاۋىت كومپانياعا تەلىپ، Facebook پەن ۇكىمەتتىڭ بىرلەسكەن مالىمدەمەسى رەتىندە جاريالاۋى قوعامدا سىني پىكىر تۋدىردى.

مينيسترلىك پەن كومپانيا اراسىنداعى «اقپارات ايتىسى» قازاقستاندا بۋللينگ جانە كيبەربۋللينگ ماسەلەسىن شەشۋ ماقساتىندا الەۋمەتتىك جەلىلەردى «ءۋاجدى سەبەپپەن بۇعاتتاۋ» شارتىن قامتيتىن زاڭ جوباسى قارالىپ جاتقان كەزگە تۇسپا-تۇس كەلدى. بۇل ازاماتتىق قوعام مەن كوپتەگەن قۇقىق قورعاۋشىلار تاراپىنان قاتتى سىنعا ۇشىرادى.

The Qazaq Times