Körneki suret. Fotokollaj: zhaikpress.kz

Mas küyde nemese es-aqılınan ayıratın zattardı qoldanğan kölik jürgizuşilerine qatıstı jauapkerşilik küşeyip, jaza qatayğanımen, – jol boyında bolatın qılmıstıq oqiğalardıñ sanı azaymay twr. Bwl turalı Bas prokuratura QT redakciyasınıñ swrauına joldağan jauabında habarlandı.

Qazaqstannıñ Bas prokuraturası jauapkerşilik qatayğanımen nätije bermegenin aytadı.

«Alayda jaña jeke qılmıstıq bap engizilgenmen, mas küyde jasalğan jol-kölik qılmıstarınıñ sanı azayğan joq. Statistikağa süyensek, biıl 9 ayda (2021 jılğı qañtar-qırküyek ayları aralığında – QT) bwl qılmıs 12,4%-ğa, 201-den 226-ğa deyin ösip otır», – delingen prokuratura organınıñ ortalıq apparatı joldağan jauapta.

2019 jıldıñ soñına qaray Qılmıstıq kodekstiñ 345-1-babına, kölikti masañ küyde nemese alkogol' jäne esirtki qoldanıp jürgizetinderge jazanı qatañdatu turalı zañ küşine engen edi.

Zañdağı özgeriske säykes, kölik qwralın basqaruğa qwqılı jürgizuşi «alkogol'dik, esirtkilik jäne (nemese) uıtqwmarlıq masañ küyde» äldekimniñ densaulığına türli deñgeyde ziyan keltirgen jağdayda lauazımınan 10 jılğa deyingi merzimge şettete otırıp, qosımşa 1000-3000 AEK ayıppwl salu, 400-1200 sağatqa qoğamdıq jwmısqa tartu, bir ya üş jılğa deyin bas bostandığın ayıru nemese şekteu jazalarınıñ biri tağayındaladı. Eger bir nemese odan köp adam qaytıs bolsa, 10 jıldan ömir boyına deyingi uaqıtqa jürgizuşi kuäliginen ayıra otırıp, 7 ya 10 jılğa deyin bas bostandığın şekteuge ne ayıruğa jazalanadı.

Zañ qataymas bwrın, 2020 jılğa deyin osı taqilettes jağdayda eger adam densaulığına auır ziyan kelterse, 3 mıñ AEK ayıppwl, 5 jılğa deyin bas bostandığın şekteu, 6 jılğa deyin belgili lauazımdı atqaru jäne qanday da bir qızmetpen aynalısu qwqığı şekteu, al ölim jağdayı orı alğanda 5-7 jılğa deyin bostandığın şekteu, 7 jılğa deyin belgili lauazımdı atqaru jäne qanday da bir qızmetpen aynalısu qwqığı şekteu jazası qoldanılıp kelgen.

Resmi esepke qarağanda, Qazaqstanda jıl sayın 30 mıñnan asa mas küyde kölik jürgizu derekteri tirkeledi. Sonday-aq, jol-kölik oqiğaları saldarınan ortaşa eseppen eki mıñday adam qaytıs boladı, onıñ 90%-ı jürgizuşilerdiñ kinäsinen boladı.

The Qazaq Times