Törtinşi biliktiñ şın şıraqşıları retinde marapattalğan Maria Ressa men Dmitriy Muratov. Körneki illyustraciya: The Nobel Peace Prize / Niklas Elmenhed

Reseylik «Novaya gazeta» bas redaktorı men filippindik Rappler basılımınıñ negizin qalağan jurnalist «söz bostandığı üşin batıl küreskeni üşin» Nobel' sıylığınıñ beybitşilik atalımı boyınşa laureattarı atandı.

Nobel' sıylığınıñ resmi habarlamasına qarağanda, sıylıq olarğa «Filippinde jäne Reseyde söz bostandığı üşin batıl küresip, demokratiya men bayandı beybit ömirdiñ bastı alğışartı bolıp sanalatın söz bostandığın qorğauğa salğan küş-jigeri üşin» berildi. Sonımen qatar, wyımdastıruşı komitettiñ pikirinşe, «demokratiya men baspasöz bostandığın qazirgidey şielenisken kürdeli kezeñde ideal deñgeyinde qoldaytın jurnalisterdiñ ökilderi» retinde qwqay körse de wstanımınan taymağan äriptester marapatqa äbden layıq.

«[Qızmetkerleriniñ] ölim[i] men qauip-qaterge qaramastan, «Novaya gazeta» basılımınıñ bas redaktorı Dmitriy Mwratov (Muratov – tüpnwsqa) gazettiñ täuelsiz sayasatınan bas tartqan joq. Ol jurnalisterdiñ qwqığın däyekti türde qorğadı», – dedi norvegiyalıq Nobel' komitetiniñ basşısı Berit Reys-Andersen VVS Orıs qızmetine bergen swhbatında.

Mwratov 11 jıldan keyin Nobel' sıylığınıñ laureattar estafetasın Reseyge qayta jalğadı. Ol «beybitşilik» jolındağı marapattı Saharov pen Gorboçevten keyin türlentken üşinşi adam. «Novaya gazeta» negizin qalauşılardıñ biri retinde ol 1995-2017 jıldarı bas redaktor bolğan, keyin 2019 jılı qaytadan osı ornına oraldı.

«Igor' Domnikov, YUriy Şekoçihin, Anna Politkovskaya, Stas Markelov, Anastasiya Baburova, Nataşa Estemirovalar bügin Nobel' sıylığın aldı», – dedi küresker redaktor äriptesterin atap.

«Pod'em» basılımına bergen pikirinde Mwratov mäşhür sıylıqtı «qazir quğın-sürginge wşırap, qısım körip jatqan reseylik jurnalistikağa arnaytının» mälimdedi. «Qazir agent retinde tanılğandarğa, qudalau körip quılğandarğa qoldan kelgenşe kömektesemiz» degen rayınan qaytpaytının tağı qaytaladı.

«Jurnalist jäne Rappler basılımınıñ negizin qalauşı retinde Mariya Ressa özin söz bostandığınıñ közsiz-batıl qorğauşısı retinde tanıttı. Rappler Duterte rejiminiñ esirtkige qarsı küresindegi daulı-qandıqol nauqanın qattı sınğa aldı. Mariya Ressa öziniñ tuğan elinde, Filippinde bilikti asıra paydalanu, zorlıq - zombılıq jäne meñdep bara jatqan avtoritarizmdi äşkereleu üşin negizgi äri qarapayım qwqığı söz bostandığı haqın paydalanadı», – dep tüsindirdi Reys-Andersen komitettiñ ekinşi şeşimi turalı.

Bwdan özge Düniejüzilik densaulıq saqtau wyımı, Şekarasız tilşiler wyımı, reseylik oppozicioner Aleksey Naval'nıy, Belarus' oppoziciyasınıñ jetekşisi Svetlana Tihanovskaya jäne ekoaktivist Greta Tunberg sıylıqtıñ favoritteri qatarına endi. Jalpı beybitşilik sıylığına 329 ümitker (234 adam jäne 95 wyım) ötinim bergen.

"The Qazaq Times"