رەسەيلىك «نوۆايا گازەتا» باس رەداكتورى مەن فيليپپيندىك Rappler باسىلىمىنىڭ نەگىزىن قالاعان جۋرناليست «ءسوز بوستاندىعى ءۇشىن باتىل كۇرەسكەنى ءۇشىن» نوبەل سىيلىعىنىڭ بەيبىتشىلىك اتالىمى بويىنشا لاۋرەاتتارى اتاندى.
نوبەل سىيلىعىنىڭ رەسمي حابارلاماسىنا قاراعاندا، سىيلىق ولارعا «فيليپپيندە جانە رەسەيدە ءسوز بوستاندىعى ءۇشىن باتىل كۇرەسىپ، دەموكراتيا مەن باياندى بەيبىت ءومىردىڭ باستى العىشارتى بولىپ سانالاتىن ءسوز بوستاندىعىن قورعاۋعا سالعان كۇش-جىگەرى ءۇشىن» بەرىلدى. سونىمەن قاتار، ۇيىمداستىرۋشى كوميتەتتىڭ پىكىرىنشە، «دەموكراتيا مەن ءباسپاسوز بوستاندىعىن قازىرگىدەي شيەلەنىسكەن كۇردەلى كەزەڭدە يدەال دەڭگەيىندە قولدايتىن جۋرناليستەردىڭ وكىلدەرى» رەتىندە قۇقاي كورسە دە ۇستانىمىنان تايماعان ارىپتەستەر ماراپاتقا ابدەن لايىق.
«[قىزمەتكەرلەرىنىڭ] ءولىم[ى] مەن قاۋىپ-قاتەرگە قاراماستان، «نوۆايا گازەتا» باسىلىمىنىڭ باس رەداكتورى دميتري مۇراتوۆ (مۋراتوۆ – تۇپنۇسقا) گازەتتىڭ تاۋەلسىز ساياساتىنان باس تارتقان جوق. ول جۋرناليستەردىڭ قۇقىعىن دايەكتى تۇردە قورعادى»، – دەدى نورۆەگيالىق نوبەل كوميتەتىنىڭ باسشىسى بەريت رەيس-اندەرسەن ۆۆس ورىس قىزمەتىنە بەرگەن سۇحباتىندا.
مۇراتوۆ 11 جىلدان كەيىن نوبەل سىيلىعىنىڭ لاۋرەاتتار ەستافەتاسىن رەسەيگە قايتا جالعادى. ول «بەيبىتشىلىك» جولىنداعى ماراپاتتى ساحاروۆ پەن گوربوچەۆتەن كەيىن تۇرلەنتكەن ءۇشىنشى ادام. «نوۆايا گازەتا» نەگىزىن قالاۋشىلاردىڭ ءبىرى رەتىندە ول 1995-2017 جىلدارى باس رەداكتور بولعان، كەيىن 2019 جىلى قايتادان وسى ورنىنا ورالدى.
«يگور دومنيكوۆ، يۋري ششەكوچيحين، اننا پوليتكوۆسكايا، ستاس ماركەلوۆ، اناستاسيا بابۋروۆا، ناتاشا ەستەميروۆالار بۇگىن نوبەل سىيلىعىن الدى»، – دەدى كۇرەسكەر رەداكتور ارىپتەستەرىن اتاپ.
«پودەم» باسىلىمىنا بەرگەن پىكىرىندە مۇراتوۆ ءماشھۇر سىيلىقتى «قازىر قۋعىن-سۇرگىنگە ۇشىراپ، قىسىم كورىپ جاتقان رەسەيلىك جۋرناليستيكاعا ارنايتىنىن» مالىمدەدى. «قازىر اگەنت رەتىندە تانىلعاندارعا، قۋدالاۋ كورىپ قۋىلعاندارعا قولدان كەلگەنشە كومەكتەسەمىز» دەگەن رايىنان قايتپايتىنىن تاعى قايتالادى.
«جۋرناليست جانە Rappler باسىلىمىنىڭ نەگىزىن قالاۋشى رەتىندە ماريا رەسسا ءوزىن ءسوز بوستاندىعىنىڭ كوزسىز-باتىل قورعاۋشىسى رەتىندە تانىتتى. Rappler دۋتەرتە رەجيمىنىڭ ەسىرتكىگە قارسى كۇرەسىندەگى داۋلى-قاندىقول ناۋقانىن قاتتى سىنعا الدى. ماريا رەسسا ءوزىنىڭ تۋعان ەلىندە، فيليپپيندە بيلىكتى اسىرا پايدالانۋ، زورلىق - زومبىلىق جانە مەڭدەپ بارا جاتقان ءاۆتوريتاريزمدى اشكەرەلەۋ ءۇشىن نەگىزگى ءارى قاراپايىم قۇقىعى ءسوز بوستاندىعى حاقىن پايدالانادى»، – دەپ ءتۇسىندىردى رەيس-اندەرسەن كوميتەتتىڭ ەكىنشى شەشىمى تۋرالى.
بۇدان وزگە دۇنيەجۇزىلىك دەنساۋلىق ساقتاۋ ۇيىمى، شەكاراسىز تىلشىلەر ۇيىمى، رەسەيلىك وپپوزيتسيونەر الەكسەي ناۆالنىي، بەلارۋس وپپوزيتسياسىنىڭ جەتەكشىسى سۆەتلانا تيحانوۆسكايا جانە ەكواكتيۆيست گرەتا تۋنبەرگ سىيلىقتىڭ فاۆوريتتەرى قاتارىنا ەندى. جالپى بەيبىتشىلىك سىيلىعىنا 329 ۇمىتكەر (234 ادام جانە 95 ۇيىم) ءوتىنىم بەرگەن.
شەرزاتتىڭ ءولىمى ىسىنە قاتىستى قۇپيا ۆيدەونى جاريالاۋ كىمگە كەرەك بولدى؟ – ساراپشىلار مەديا سىنى
24 قازان – كىتاپحاناشىلار مەرەكەسى قۇتتى بولسىن!
«ۋچاسكەدەن ارۋاققا كوك حات»: الماتىدا مارقۇمعا كەلگەن شاقىرتۋ
كوميسسيا مەن باقىلاۋشى ەسەبىندەگى ايىرماشىلىق: الماتىدا رەفەرەندۋم قالاي ءوتىپ جاتىر؟
ء"ادىل قازاقستان، ەستيتىن مەملەكەت" ەندى ادۆوكاتتارعا قىسىم جاساي باستادى ما؟
«پسەۆدو-بايقاۋشى» الدە كاسىبي باقىلاۋشى: رەفەرەندۋمدى كىم باقىلايدى؟