Şañıraq oqiğasına baylanıstı 18 jılğa sottalğan dissident aqın Aron Atabek auruhanada jatır. Bwl aqparattı alğaş bolıp qwqıq qorğauşı Baqıtjan Töreğojina Facebook paraqşasında habarladı.

Keyin bwl aqparattı qwqıq qorğauşı Elena Semenovanıñ sözine süyegen Azattıq radiosı tarqatıp jazdı.

Basılımnıñ jazuınşa, Aron Atabektiñ auruhanağa tüskenine bir apta bolğan. Ol emdelip jatır.

"Ol bwğan deyin emdeluge üzildi-kesildi qarsı bolıp kelgen. Oğan "auruhanağa jatpasañız, sal bolasız, ömir boyı arbağa tañılasız" dep qatañıraq aytqanmın. "Tım bolmağanda, ayaq-qolğa qarapayım massaj jasatu üşin barıñız" degenmin. Qazir säl kişkene qozğalıs bar siyaqtı. Tolıq tekseruden ötip jatır. Negizinen vitaminder qabıldaydı. Tekseruden ötip, analizderin tapsırğannan keyin qanday da bir em körsetetin şığar" dep keltirdi Azattıq qwqıq qorğauşı Elena Semenova sözin.

Semenovanıñ Azattıqqa aytuına qarağanda, Aron Atabek auruhanadağı tekseruden keyin türmege qaytadan oraladı.

2006 jılğı "Şañıraq" oqiğasınan keyin 18 jılğa sottalıp, 15 jılın türmede ötkizgen, qwqıq qorğauşılar sayasi twtqın dep tanığan dissidenttiñ keyingi kezde densaulığınıñ naşarlap ketkenine azamattıq qoğam ökilderi alañdauşılıq bildirgen. Jazda Qazaqstanda Wlttıq aldın alu tetigi (WAAT) qatısuşıları türmede Aron Atabekpen jolığıp, haliniñ naşar ekenin aytqan.

Juırda dissident aqındı raqımşılıqpen bosatu jöninde 2,5 mıñnan astam adamnıñ qolı bar hat prezident Toqaevqa joldanğan. Bilik hatqa äzirge reakciya bildirmegen.

The Qazaq Times