شاڭىراق وقيعاسىنا بايلانىستى 18 جىلعا سوتتالعان ديسسيدەنت اقىن ارون اتابەك اۋرۋحانادا جاتىر. بۇل اقپاراتتى العاش بولىپ قۇقىق قورعاۋشى باقىتجان تورەعوجينا Facebook پاراقشاسىندا حابارلادى.

كەيىن بۇل اقپاراتتى قۇقىق قورعاۋشى ەلەنا سەمەنوۆانىڭ سوزىنە سۇيەگەن ازاتتىق راديوسى تارقاتىپ جازدى.

باسىلىمنىڭ جازۋىنشا، ارون اتابەكتىڭ اۋرۋحاناعا تۇسكەنىنە ءبىر اپتا بولعان. ول ەمدەلىپ جاتىر.

"ول بۇعان دەيىن ەمدەلۋگە ءۇزىلدى-كەسىلدى قارسى بولىپ كەلگەن. وعان "اۋرۋحاناعا جاتپاساڭىز، سال بولاسىز، ءومىر بويى ارباعا تاڭىلاسىز" دەپ قاتاڭىراق ايتقانمىن. "تىم بولماعاندا، اياق-قولعا قاراپايىم ماسساج جاساتۋ ءۇشىن بارىڭىز" دەگەنمىن. قازىر ءسال كىشكەنە قوزعالىس بار سياقتى. تولىق تەكسەرۋدەن ءوتىپ جاتىر. نەگىزىنەن ۆيتاميندەر قابىلدايدى. تەكسەرۋدەن ءوتىپ، اناليزدەرىن تاپسىرعاننان كەيىن قانداي دا ءبىر ەم كورسەتەتىن شىعار" دەپ كەلتىردى ازاتتىق قۇقىق قورعاۋشى ەلەنا سەمەنوۆا ءسوزىن.

سەمەنوۆانىڭ ازاتتىققا ايتۋىنا قاراعاندا، ارون اتابەك اۋرۋحاناداعى تەكسەرۋدەن كەيىن تۇرمەگە قايتادان ورالادى.

2006 جىلعى "شاڭىراق" وقيعاسىنان كەيىن 18 جىلعا سوتتالىپ، 15 جىلىن تۇرمەدە وتكىزگەن، قۇقىق قورعاۋشىلار ساياسي تۇتقىن دەپ تانىعان ديسسيدەنتتىڭ كەيىنگى كەزدە دەنساۋلىعىنىڭ ناشارلاپ كەتكەنىنە ازاماتتىق قوعام وكىلدەرى الاڭداۋشىلىق بىلدىرگەن. جازدا قازاقستاندا ۇلتتىق الدىن الۋ تەتىگى (ۇاات) قاتىسۋشىلارى تۇرمەدە ارون اتابەكپەن جولىعىپ، ءحالىنىڭ ناشار ەكەنىن ايتقان.

جۋىردا ديسسيدەنت اقىندى راقىمشىلىقپەن بوساتۋ جونىندە 2,5 مىڭنان استام ادامنىڭ قولى بار حات پرەزيدەنت توقاەۆقا جولدانعان. بيلىك حاتقا ازىرگە رەاكتسيا بىلدىرمەگەن.

The Qazaq Times