Naurızdağı onlayn sammit. Foto: Quad

Eki aptadan keyin AQŞ, Japoniya, Australiya jäne Ündistan törttiginiñ liderleri alğaş ret betpe-bet sammit ötkizedi. Keşe Ündistan ükimeti sammitke qatıstı dayındıq jwmıstarınıñ soñğı kezeñge ötkenin mälimdedi. Bwl jinalıs bolaşaqta Ündi-Tınıq mwhit aymağında osı atalğan törttiktiñ Qıtayğa qarsı qalay äreket etetinin şeşetin mañızdı otırıs bolmaq.

Japonnıñ «Kiodo» jañalıqtar qızmeti habarlağanınday, «Törttik odaq» (qazirşe osılay atauğa boladı) basşıları Uaşingtonda 24 qırküyek küni bas qosadı. Bwl sammit barısında tört el jeke-jeke de kezdesuler ötkizip, qauipsizdik odaqqa aynalğalı twrğan jaña alyanstıñ işki berekesin nığayta tüsedi dep kütilude.

Osı arada qosımşalay keteyik, Ioşihide Suga mırza Japoniyanıñ bas uäziri retinde soñğı ret Amerika Qwrama Ştattarına saparmen baradı. Prem'er-ministr qızmetin atqaruşı bolıp otırğan ol aldağı saylauğa qatıspaytının ötken aptada mälimdegen edi. Bwrınğı prem'er Şindzo Abe mırzanıñ densaulıq jağdayna baylanıstı Ioşihide Suğa 30 qırküyekke deyin onıñ qızmetin atqaruğa ökiletti bolğan Japonnıñ jaña bas uäziri 29 qırküyektegi saylauda belgili boladı.

Japon basılımdarınıñ habarına qarağanda, Suga mırzanıñ AQŞ saparına közqaraqtı japon qoğamı ayrıqşa nazar audarıp otır. Kelesi prem'er-ministr kim bolsa da Japon-AQŞ qatınasın nığaytuğa küş saladı dep ümittenedi, sondıqtan da Suga mırzanıñ kezekti saparı bolaşaq ükimet jetekşisiniñ diplomatiyasına jol aşadı dep sanaydı.

Al, manağı «Törttik odaqqa» keletin bolsaq, AQŞ prezidenti Jo Bayden, japon bas uäziri Ioşihide Suga, Australiya prem'eri Skott Morrison men Ündistan prem'er -ministri Narendra Modi naurız ayında onlayn sammit ötkizgen bolatın. Onda da Qıtay taqırıbı talqınıñ negizgi mazmwnında twrğan. Olar Beyjiñniñ barğan sayın artıp bara jatqan äskeri qateri men özge de ıqpal-äserlerine, jahandıq klimat mäselesinde, pandemiyağa qarsı küres isterinde, sonday-aq, qauipsizdik mäselelerinde ıntımaqtasa tüsuge uädelesken edi.

Betpe-bet jüzdesip, berilgen uädeni bekemdeudi AQŞ prezidenti Bayden wsınğan bolatın. Sondıqtan aldağı resmi kezdesude tört eldiñ ıntımaqtastıq äreketterin tereñ üylestiru mäselesi qaraladı. Onda da ortaq müddeler men qauipsizdikke qatıstı mäseleler aşıq talqılanbaq. Ayta keteyik, bwl tört eldi «Aşıq jäne Erkin Ündi-Tınıq mwhit aymağı» degen geosayasi wran biriktirip otır.

The Qazaq Times