7 künnen asa uaqıt wlın körmegen äke Talğat Däuitbaywlı (qızıl köylekte, sol jaqtan birinşi) öñir äkimi Berdikbek Saparbaev pen Jambıldağı jarılısqa baylanıstı otstavkağa ketken qorğanıs ministri Nwrlan Ermekbaevtan qızmetkerlerdiñ qauipti aymaqtan der kezinde evakuaciyalanbau sebebin swrap twrğan kezi. 30 tamız 2021 jıl. Jambıl oblısı, Bayzaq audanı. Foto: QT / Kültegin Aspanwlı

Qazaqstannıñ zamanaui tarihında qorğanıs salasındağı qaralı oqiğanıñ biri – Jambıl oblısında qaytalanğan äskeri bölim jarılısınan japa şekken tağı bir qızmetkerdi izdeu jalğasıp jatır.

Redakciya habarlasqan Jambıl oblısınıñ İşki sayasat basqarmasınıñ basşısı Beyqwt  Jamangozov tür-tüsi anıqtalğan 15 marqwmnıñ denesi tuıstarına berilgenin habarladı. Biraq äskeri bölimniñ iz-tüssiz joğalğan bir qızmetkeri tabılmadı.

«Mamandar bir adamdı äli izdep jatır. Äskeri bölimniñ arğı jağı (oñtüstik bağıtı, tau silemine qaray – QT) 20 şaqırım jer tügel dron-beynekamera arqılı qaraldı. Äzirge tabıla qoyğan joq», – dedi ol.

Qazirgi tañda izdestirilip jatqan adam – oqiğa ornında qalıp qoyğan 16-şı qızmetker, 33 jastağı kişi serjant Bauırjan Däuitbaev. Ol jarılıs bolğan äskeri bölimniñ örtke qarsı qwtqaru bölimşesi basşısı retinde qızmet etken. Onıñ üş wlı jäne bir qızı bar, sonday-aq äyeli besinşi perzentine ayağı auır.

Bir aptadan beri №28349 äskeri bölimniñ mañayınan bauırın auıl twrğındarımen birge izdegen Erbol Däuitbaev jäne onıñ tuıstarı blok-bekettiñ auzında künde habar tosıp otır. Olardıñ keybiri qattı jarılıstan kontuziya alıp tau-tas arasın bassauğalap, adasıp ketken boluı mümkin dep ümittenedi.

«Äli osındamız. Ministrlik ökili Jwmabek Hasenov jağdaydı bayandap twr. Endi sırttan izdep jatır. Keşe äskeriler qoldanıp jatqan bir dronın körsetti. Negizi qajeti sol tikwşaq bolmay twr», – dedi äskeridiñ ağası Erbol Däuitbaev.

Oqiğa ornında arnayı üyretilgen birneşe iisşil it, kinolog mamandar men saperler jwmıs istep jatır. Jarılıstıñ saldarın joyu maqsatında jüzdegen qızmetker jwmıldırılğan.

26 tamızda Jambıl oblısında äskeri qoymadan ört şığıp, artı alapat jarılısqa wlasqan. 20 şaqtı ret jarılğan dümpuden äskeri bölim tübindegi Qaynar auılı men körşiles birneşe eldi mekenniñ twrğındarı evakuaciyalanğan. Apattıñ kesirinen 15 adam qaza tauıp, jüz şaqtı qızmetker jaralanğan. Joyqın jarılıstan 124 ğimarat bülingen. Qazir äskeri bölim ornalasqan Bayzaq audanı köleminde tötenşe jağday engizilgen.

Ermekbaevtıñ ministr retinde soñğı swhbatı: Jaqının izdegender äkim men ministrdi swraqqa aldı - YouTube

The Qazaq Times