قازاقستاننىڭ زاماناۋي تاريحىندا قورعانىس سالاسىنداعى قارالى وقيعانىڭ ءبىرى – جامبىل وبلىسىندا قايتالانعان اسكەري ءبولىم جارىلىسىنان جاپا شەككەن تاعى ءبىر قىزمەتكەردى ىزدەۋ جالعاسىپ جاتىر.

رەداكتسيا حابارلاسقان جامبىل وبلىسىنىڭ ىشكى ساياسات باسقارماسىنىڭ باسشىسى بەيقۇت  جامانگوزوۆ ءتۇر-ءتۇسى انىقتالعان 15 مارقۇمنىڭ دەنەسى تۋىستارىنا بەرىلگەنىن حابارلادى. بىراق اسكەري ءبولىمنىڭ ءىز-ءتۇسسىز جوعالعان ءبىر قىزمەتكەرى تابىلمادى.

«ماماندار ءبىر ادامدى ءالى ىزدەپ جاتىر. اسكەري ءبولىمنىڭ ارعى جاعى (وڭتۇستىك باعىتى، تاۋ سىلەمىنە قاراي – QT) 20 شاقىرىم جەر تۇگەل درون-بەينەكامەرا ارقىلى قارالدى. ازىرگە تابىلا قويعان جوق»، – دەدى ول.

قازىرگى تاڭدا ىزدەستىرىلىپ جاتقان ادام – وقيعا ورنىندا قالىپ قويعان 16-شى قىزمەتكەر، 33 جاستاعى كىشى سەرجانت باۋىرجان داۋىتباەۆ. ول جارىلىس بولعان اسكەري ءبولىمنىڭ ورتكە قارسى قۇتقارۋ بولىمشەسى باسشىسى رەتىندە قىزمەت ەتكەن. ونىڭ ءۇش ۇلى جانە ءبىر قىزى بار، سونداي-اق ايەلى بەسىنشى پەرزەنتىنە اياعى اۋىر.

ءبىر اپتادان بەرى №28349 اسكەري ءبولىمنىڭ ماڭايىنان باۋىرىن اۋىل تۇرعىندارىمەن بىرگە ىزدەگەن ەربول داۋىتباەۆ جانە ونىڭ تۋىستارى بلوك-بەكەتتىڭ اۋزىندا كۇندە حابار توسىپ وتىر. ولاردىڭ كەيبىرى قاتتى جارىلىستان كونتۋزيا الىپ تاۋ-تاس اراسىن باسساۋعالاپ، اداسىپ كەتكەن بولۋى مۇمكىن دەپ ۇمىتتەنەدى.

«ءالى وسىندامىز. مينيسترلىك وكىلى جۇمابەك حاسەنوۆ جاعدايدى بايانداپ تۇر. ەندى سىرتتان ىزدەپ جاتىر. كەشە اسكەريلەر قولدانىپ جاتقان ءبىر درونىن كورسەتتى. نەگىزى قاجەتى سول تىكۇشاق بولماي تۇر»، – دەدى اسكەريدىڭ اعاسى ەربول داۋىتباەۆ.

وقيعا ورنىندا ارنايى ۇيرەتىلگەن بىرنەشە ءيىسشىل يت، كينولوگ ماماندار مەن ساپەرلەر جۇمىس ىستەپ جاتىر. جارىلىستىڭ سالدارىن جويۋ ماقساتىندا جۇزدەگەن قىزمەتكەر جۇمىلدىرىلعان.

26 تامىزدا جامبىل وبلىسىندا اسكەري قويمادان ءورت شىعىپ، ارتى الاپات جارىلىسقا ۇلاسقان. 20 شاقتى رەت جارىلعان دۇمپۋدەن اسكەري ءبولىم تۇبىندەگى قاينار اۋىلى مەن كورشىلەس بىرنەشە ەلدى مەكەننىڭ تۇرعىندارى ەۆاكۋاتسيالانعان. اپاتتىڭ كەسىرىنەن 15 ادام قازا تاۋىپ، ءجۇز شاقتى قىزمەتكەر جارالانعان. جويقىن جارىلىستان 124 عيمارات بۇلىنگەن. قازىر اسكەري ءبولىم ورنالاسقان بايزاق اۋدانى كولەمىندە توتەنشە جاعداي ەنگىزىلگەن.

ەرمەكباەۆتىڭ مينيستر رەتىندە سوڭعى سۇحباتى: جاقىنىن ىزدەگەندەر اكىم مەن ءمينيستردى سۇراققا الدى - YouTube

The Qazaq Times