Jarılıs kezinde joğalğan tuısınan habar kütip otırğan topqa kele jatqan qorğanıs ministri Nwrlan Ermekbaev. 30 tamız 2021 jıl. Jambıl oblısı, Bayzaq audanı, Qaynar auılına kireberisi. Foto: QT / Kültegin Aspanwlı

Qazaqstan Qorğanıs ministri Nwrlan Ermekbaev qızmetinen bosatıldı. Bwl aqparttı 31 tamız küni el prezidenti Qasım-Jomart Toqaevtıñ baspasöz hatşısı Berik Uäli Facebook  paraqşasında habarladı. 

"Memleket basşısı Qasım-Jomart Toqaev Qorğanıs ministri Nwrlan Ermekbaevtıñ qızmetten bosatu jönindegi raportın qarastırıp, onıñ ötinişin qabıldadı" dep jazdı Berik Uäli.

26 tamız keşkisin Jambıl oblısı Bayzaq audanındağı №28349 äskeri bölimi aumağındağı oq-däri saqtalatın qoymada jarılıs boldı. Saldarınan 15 adam qaza tauıp, 98 adam zardap şekken. Oqiğa bolğan kezde habar-oşarsız ketken bir adamdı äli izdep jatır.

Ondağan adamnıñ ömirin jalmağan joyqın jarılısqa ne sebep bolğanı äli naqtı belgisiz. Biraq Ermekbaevtıñ topşılauınşa, jarılısqa qoymada qauipsizdik talaptarınıñ saqtalmauı, ya himiyalıq reakciyamen özdiginen tuuı nemese diversiya sebep boluı mümkin.

Ministr Ermekbaev Jambıldağı joyqın jarılıstan keyin otstavkağa ketudi wyğarğanın aytqan.

58 jastağı Ermekbaev 2018 jıldıñ tamızınan beri qorğanıs ministri boldı. Jambıl oblısındağı jarılıstan eki jıl bwrın Türkistan oblısı Arıs qalasında da osığan wqsas apat bolğan. Arısta 3 mıñ vagonğa teñ 117 mıñ tonna oq-däri men qaru-jaraq jarılğan. Jarılıs saldarınan bes adam qaza tauıp, 165 adam medicinalıq kömekke jügindi. Ondağan äleumettik mañızdı nısan bülinip, mıñdağan twrğın üy zaqımdanğan edi.

Sol kezde ministr Ermekbaev  bir qalanıñ halqın bosıtıp, twrqın tıp-tipıl etken apattı "tabiği qwbılıs" dep atap, halıqtan "keşirim swraudıñ retin körip twrğan joqtığın" aytqannan keyin köptiñ sınına qalğan. Dese de qoğamdağı otstavka turalı talap jii aytılğanımen, ol jolı bilik äreketsizdik tanıtqan.

The Qazaq Times