İz-tüssiz joğalğan 3 qızmetkerdiñ tuıstarı habar tosıp twrğan kez. 29 tamız 2021 jıl. Jambıl oblısı, Bayzaq audanı, Qaynar auılınıñ mañı. Foto: QT / Kültegin Aspanwlı

Jambıl oblısındağı joyqın jarılıstan mert bolğandar qatarı joğalğandar esebinen tağı arttı. İzdestiru jwmıstarı negizinde iisşil ittiñ kömegimen bir mäyit tabılğan. Bwl turalı Qazaqstannıñ Tötenşe jağday ministrliginiñ baspasöz qızmeti habarladı.

«Qorğanıs ministrliginiñ saperleri oqiğa ornınan  tağı bir adamnıñ denesin taptı. Onıñ jeke bas mälimetteri anıqtalıp jatır. Marqwmdar arasında azamattıq qorğau organdarınıñ qızmetkerleri de bar. Joğalğan eki adam izdestirilude», – delingen resmi habarlamada.

Äkimdik ökiliniñ öñirdegi QT tilşisine bergen mälimeti boyınşa, mayor Sayat Janatwlı Älimbekovtiñ tüsin äyeli tanıp, rastağan. 36 jastağı tarazdıq azamat äskeri bölimniñ tehnikalıq jabdıqtau böliminde komandir orınbasarı retinde qızmet etken.

26 tamız keşkisin Jambıl oblısı Bayzaq audanındağı №28349 äskeri bölimi aumağında ornalasqan oq-däri saqtalatın qoymada jarılıs boldı. Soñğı resmi derekke say, tötenşe oqiğa saldarınan 14 adam qaza tauıp, 100 şaqtı adam zardap şekken.

Äskeri bölimniñ tübindegi Qaynar şağın auılında 17 üyde 90-ğa tarta twrğın mekendeydi. Audan köleminde 118 üy-nısan bülingen. Aymaqtağı atqaruşı bilik ökilderi eki ay merzimde barlıq materialdıq jäne infroqwrılım şığındarın qalıpqa keltiruge uäde berdi.

Oqiğa bolğan kezde habar-oşarsız ketken eki adamdı äli izdep jatır.  Olardı tabu üşin kinolog, iisşil itter, saperler, äskeriler, TJ mamandarı, jalpı jiını 40-tan asa tehnika, 180-dey adam jwmıldırılğan.

Ondağan adamnıñ ömirin jalmağan joyqın jarılısqa ne sebep bolğanı äli belgisiz. Qorğanıs ministri Nwrlan Ermekbaevtıñ topşılauınşa, jarılısqa qoymada qauipsizdik talaptarınıñ saqtalmauı, ya himiyalıq reakciyamen özdiginen tuuı nemese diversiya sebep boluı mümkin.

The Qazaq Times