ءىز-ءتۇسسىز جوعالعان 3 قىزمەتكەردىڭ تۋىستارى حابار توسىپ تۇرعان كەز. 29 تامىز 2021 جىل. جامبىل وبلىسى، بايزاق اۋدانى، قاينار اۋىلىنىڭ ماڭى. فوتو: QT / كۇلتەگىن اسپانۇلى

جامبىل وبلىسىنداعى جويقىن جارىلىستان مەرت بولعاندار قاتارى جوعالعاندار ەسەبىنەن تاعى ارتتى. ىزدەستىرۋ جۇمىستارى نەگىزىندە ءيىسشىل ءيتتىڭ كومەگىمەن ءبىر ءمايىت تابىلعان. بۇل تۋرالى قازاقستاننىڭ توتەنشە جاعداي مينيسترلىگىنىڭ ءباسپاسوز قىزمەتى حابارلادى.

«قورعانىس مينيسترلىگىنىڭ ساپەرلەرى وقيعا ورنىنان  تاعى ءبىر ادامنىڭ دەنەسىن تاپتى. ونىڭ جەكە باس مالىمەتتەرى انىقتالىپ جاتىر. مارقۇمدار اراسىندا ازاماتتىق قورعاۋ ورگاندارىنىڭ قىزمەتكەرلەرى دە بار. جوعالعان ەكى ادام ىزدەستىرىلۋدە»، – دەلىنگەن رەسمي حابارلامادا.

اكىمدىك وكىلىنىڭ وڭىردەگى QT تىلشىسىنە بەرگەن مالىمەتى بويىنشا، مايور سايات جاناتۇلى الىمبەكوۆتىڭ ءتۇسىن ايەلى تانىپ، راستاعان. 36 جاستاعى تارازدىق ازامات اسكەري ءبولىمنىڭ تەحنيكالىق جابدىقتاۋ بولىمىندە كوماندير ورىنباسارى رەتىندە قىزمەت ەتكەن.

26 تامىز كەشكىسىن جامبىل وبلىسى بايزاق اۋدانىنداعى №28349 اسكەري ءبولىمى اۋماعىندا ورنالاسقان وق-ءدارى ساقتالاتىن قويمادا جارىلىس بولدى. سوڭعى رەسمي دەرەككە ساي، توتەنشە وقيعا سالدارىنان 14 ادام قازا تاۋىپ، 100 شاقتى ادام زارداپ شەككەن.

اسكەري ءبولىمنىڭ تۇبىندەگى قاينار شاعىن اۋىلىندا 17 ۇيدە 90-عا تارتا تۇرعىن مەكەندەيدى. اۋدان كولەمىندە 118 ءۇي-نىسان بۇلىنگەن. ايماقتاعى اتقارۋشى بيلىك وكىلدەرى ەكى اي مەرزىمدە بارلىق ماتەريالدىق جانە ينفروقۇرىلىم شىعىندارىن قالىپقا كەلتىرۋگە ۋادە بەردى.

وقيعا بولعان كەزدە حابار-وشارسىز كەتكەن ەكى ادامدى ءالى ىزدەپ جاتىر.  ولاردى تابۋ ءۇشىن كينولوگ، ءيىسشىل يتتەر، ساپەرلەر، اسكەريلەر، تج ماماندارى، جالپى جيىنى 40-تان اسا تەحنيكا، 180-دەي ادام جۇمىلدىرىلعان.

ونداعان ادامنىڭ ءومىرىن جالماعان جويقىن جارىلىسقا نە سەبەپ بولعانى ءالى بەلگىسىز. قورعانىس ءمينيسترى نۇرلان ەرمەكباەۆتىڭ توپشىلاۋىنشا، جارىلىسقا قويمادا قاۋىپسىزدىك تالاپتارىنىڭ ساقتالماۋى، يا حيميالىق رەاكتسيامەن وزدىگىنەن تۋى نەمەسە ديۆەرسيا سەبەپ بولۋى مۇمكىن.

The Qazaq Times