"Dempartiya" jaqtastarınıñ "Bauırjan Baybekke sadaqa" akciyası. Foto: Facebook

Almatıda "Dempartiya" jaqtastarı halıqtan "Nwr Otan" partiyası törağasınıñ birinşi orınbasarı Bauırjan Baybekke sadaqa berudi swrap qalanıñ ortalıq köşelerinde akciya ötkizdi. Olarğa bir top adam qarsılıq körsetip, aqşa jinağan qorabın alıp ketti. 

Janbolat Mamaydıñ jaqtastarına qarsılıq körsetkender plakat pen dauıs zoraytqış wstap alğan. Plakattarına "Sot şeşimin orında" dep jazğan olar "Janbolat alayaq", "Mamay - satqın!", "Mamay qarabet!" dep wrandatttı. Al Mamay jaqtastarı olardı "biliktiñ tituşkaları" dep ayıptadı.

Biıl mausımda Almatı  qalası Äuezov audandıq sotı Janbolat Maymay men onıñ äyeli Inga Imanbaydı "Nwr Otan" partiyası törağasınıñ birinşi orınbasarı Bauırjan Baybekke 950 mıñ teñge köleminde ayppwl töleuge mindettegen. Mamay sot mindettegen aqşanı halıqtan "Baybekke sadaqa" degen akciya arqılı jinaytının mälimdegen.

Sot şeşimine say, Mamay men Imanbay Baybek jaylı fil'mdi internetten öşirip, ondağı derekti joqqa şığaruı tiis. Biraq Janbolat Mamay äleumettik jelige jariyalanğan video öşirilmeytinin jäne onı teriske şığarmaytının aytqan.

Baybek pen Mamay arasındağı daudıñ tuındauına säuir ayında şıqqan fil'm-zertteu türtki bolğan. Janbolat Mamay säuirde Youtube-tegi "Demokratiyalı Qazaqstan/Demokratiçeskiy Kazahstan" arnasında "Bauırjan Baybek: Nazarbaev sınıptası balasınıñ jemqor biznes-imperiyası" attı video jariyalağan. Derekti fil'm stilinde tüsirilgen videoda Janbolat Mamay Almatınıñ bwrınğı äkimi Bauırjan Baybekti "memlekettik qızmette jürip ülken biznes-imperiya qwrdı", "Almatı äkimi bolğan 4 jılda 1 milliard dollar zañsız aqşa taptı", "qwrılısqa jäne kölik twrağına" qala aumağınıñ jäne İle-Alatau wlttıq parkiniñ "jerin berdi", "para aldı", "kömir mafiyasın qwrdı" jäne Almatıdağı JES-2-ni "gazğa köşirudi keşeuildetti", "adam qwqıqtarın bwzdı" dep ayıptağan. Al Baybek "Mamaydıñ aytqandarı dälelsiz" dep sotqa şağımdanğan.

The Qazaq Times