باۋىرجان بايبەككە ساداقا سۇراپ كوشەگە شىققان «دەمپارتيا» جاقتاستارى قارسىلىققا تاپ بولدى

الماتىدا "دەمپارتيا" جاقتاستارى حالىقتان "نۇر وتان" پارتياسى توراعاسىنىڭ ءبىرىنشى ورىنباسارى باۋىرجان بايبەككە ساداقا بەرۋدى سۇراپ قالانىڭ ورتالىق كوشەلەرىندە اكتسيا وتكىزدى. ولارعا ءبىر توپ ادام قارسىلىق كورسەتىپ، اقشا جيناعان قورابىن الىپ كەتتى. 

جانبولات مامايدىڭ جاقتاستارىنا قارسىلىق كورسەتكەندەر پلاكات پەن داۋىس زورايتقىش ۇستاپ العان. پلاكاتتارىنا "سوت شەشىمىن ورىندا" دەپ جازعان ولار "جانبولات الاياق", "ماماي - ساتقىن!", "ماماي قارابەت!" دەپ ۇرانداتتتى. ال ماماي جاقتاستارى ولاردى "بيلىكتىڭ تيتۋشكالارى" دەپ ايىپتادى.

بيىل ماۋسىمدا الماتى  قالاسى اۋەزوۆ اۋداندىق سوتى جانبولات مايماي مەن ونىڭ ايەلى ينگا يمانبايدى "نۇر وتان" پارتياسى توراعاسىنىڭ ءبىرىنشى ورىنباسارى باۋىرجان بايبەككە 950 مىڭ تەڭگە كولەمىندە ايپپۇل تولەۋگە مىندەتتەگەن. ماماي سوت مىندەتتەگەن اقشانى حالىقتان "بايبەككە ساداقا" دەگەن اكتسيا ارقىلى جينايتىنىن مالىمدەگەن.

سوت شەشىمىنە ساي، ماماي مەن يمانباي بايبەك جايلى ءفيلمدى ينتەرنەتتەن ءوشىرىپ، ونداعى دەرەكتى جوققا شىعارۋى ءتيىس. بىراق جانبولات ماماي الەۋمەتتىك جەلىگە جاريالانعان ۆيدەو وشىرىلمەيتىنىن جانە ونى تەرىسكە شىعارمايتىنىن ايتقان.

بايبەك پەن ماماي اراسىنداعى داۋدىڭ تۋىنداۋىنا ءساۋىر ايىندا شىققان فيلم-زەرتتەۋ تۇرتكى بولعان. جانبولات ماماي ساۋىردە Youtube-تەگى "دەموكراتيالى قازاقستان/دەموكراتيچەسكي كازاحستان" ارناسىندا "باۋىرجان بايبەك: نازارباەۆ سىنىپتاسى بالاسىنىڭ جەمقور بيزنەس-يمپەرياسى" اتتى ۆيدەو جاريالاعان. دەرەكتى فيلم ستيلىندە تۇسىرىلگەن ۆيدەودا جانبولات ماماي الماتىنىڭ بۇرىنعى اكىمى باۋىرجان بايبەكتى "مەملەكەتتىك قىزمەتتە ءجۇرىپ ۇلكەن بيزنەس-يمپەريا قۇردى", "الماتى اكىمى بولعان 4 جىلدا 1 ميلليارد دوللار زاڭسىز اقشا تاپتى", "قۇرىلىسقا جانە كولىك تۇراعىنا" قالا اۋماعىنىڭ جانە ىلە-الاتاۋ ۇلتتىق پاركىنىڭ "جەرىن بەردى", "پارا الدى", "كومىر مافياسىن قۇردى" جانە الماتىداعى جەس-2-ءنى "گازعا كوشىرۋدى كەشەۋىلدەتتى", "ادام قۇقىقتارىن بۇزدى" دەپ ايىپتاعان. ال بايبەك "مامايدىڭ ايتقاندارى دالەلسىز" دەپ سوتقا شاعىمدانعان.

The Qazaq Times