15 jıldan beri türmede otırğan dissident-aqın Aron Atabek. Foto: bureau.kz/

Pavlodar oblısındağı AP-162/1 tüzetu mekemesinde jazasın ötep jatqan "sayasi twtqın" Aron Atabekpen kezdesken qwqıq qorğauşılar onıñ densaulığı tım naşarlap ketkenin mälimdedi. Bwl jöninde Qazaqstandağı adam qwqığı jönindegi halıqaralıq byuronıñ resmi saytı jazdı. 

Byuro saytındağı aqparatqa qarağanda, kezdesu barısında Aron Atabek qwqıq qorğauşılarğa densaulığına baylanıstı şağımdarın aytqan.

"Eki qolım auradı, joğarı kötere almaymın, bügilmeydi, qalamsap wstaudıñ özi qiın. Ayağım da auıradı, kamera işinde ğana jüremin, seruenge şığudan bas tarttım. Taksafonğa kolyaskamen baramın. Etapta soqqığa jıqqan kezdegi jaraqattarım bolu kerek. Tolıq (medicinalıq-red) tekseruden ötudi wsındı, biraq men odan bas tarttım. Sebebi meniñ jasımda säule (obluçenie) alu qauipti dep esepeymin" depti Aron Atabek özimen kezdesken qwqıq qorğauşılarğa.

Türme äkimşiligi Aron Atabektiñ ambulatoriyalıq kartasın körsetken. Onda ol biıl 4 tamızda  qan analizin tapsırudan, flyurografiyağa tüsuden, buındarın rengenge tüsiruden bas tartqandığı jazılğan. Mekeme basşısı Ädilhan Qapışev Aron Atabek medicina qızmetkerleriniñ baqılauında ekendigin aytqan.

"№228 medicinalıq hattamasında Aron Atabektiñ süyek-buını auıratındığı, eki qolınıñ da sausaqtarı deformaciyalanğanı, jartı jıldan beri iş qatu saldarınan ülken däretke baralmay, klizma alatındığı jäne jürgende öneboyı dirildeytini jazılğan. Bwdan bölek, hattamada onıñ 30.07.2021 jılı medicinalıq tekseruden bas tartqanı jöninde, keyinnen terapevt därigerdiñ tekserudi kamerada ötkizgendigi jöninde aytılğan. Däriger Aron Atabekke cerebroskleroz, discirkulyatorlıq encefalopatiya, stenokardiya, sozılmalı gastrit, sozılmalı gemorroy, qol-ayaqtıñ artrozo-artitti diagnozdarın qoyıp, jalpı klinikalıq analiz tapsıruğa, vitaminder işuge, nevropatolog pen kardiologqa baruğa, UZI, OBP jäne rengenge tüsu keñes bergen. Biraq Aron Atabek onıñ barlığınan bas tartqan" dep jazdı Qazaqstandağı adam qwqığı jönindegi halıqaralıq byuronıñ resmi saytı.

Byuro saytınıñ mälimetinşe, Aron Atabek merziminen bwrın bosatuğa ötiniş jazbaytının, üş jıldan keyin bostandıqqa şıqqan soñ tolıqtay ötemaqı töletuge şağımdanatının jetkizgen. Bwğan qosa mekeme basşısınan merziminiñ soñına deyin eşqayda auıstırmauın swrap, soñına deyin osı jerde qalatının mälimdegen.

68 jastağı Aron Atabek 2006 jılğı 14 şilde küni Almatı irgesindegi Şañıraq eldi mekeninde bolğan oqiğadan keyin sottalğan. Sol küni Şañıraq twrğındarı bilik "zañsız soğılğan" degen üylerdi bwzuğa kelgen policiya küşine qarsılıq körsetip, eki jaq arasında qaqtığıs bolğan. Saldarınan 24 jastağı policiya oficeri qaza taptı. Bilik onıñ ölimine birneşe jergilikti twrğındı jäne sol küni Şañıraqta bolğan aqın äri dissident Aron Atabekti ayıptağan.

Sot ükimi boyınşa Aron Atabek 18 jılğa, Qwrmanğazı Ötegenov 16 jılğa, Erğanat Taranşiev 15 jılğa, Rüstem Twyaqov 14 jılğa sottaldı. Keyingi ekeui 2018 jılı merziminen bwrın bosatıldı. Ötegenov 2013 jılı türme äkimşiligi qızmetkerleriniñ "zañdı talabına bağınbadı" dep ayıptalıp, qamau merzimi eki jılğa wzartıldı.

"Şañıraq oqiğasınan" soñ bilik ondağı twrğındardıñ jeri men üyin zañdastırıp bergen.

Sot ükimi şıqqannan keyin Aron Atabek Almatıdan tısqarı jerde birneşe türmede qamauda boldı. Qazir otırğan Pavlodar tergeu izolyatorına onı 2014 jıldıñ säuirinde auıstırğan.

The Qazaq Times