پاۆلودار وبلىسىنداعى اپ-162/1 تۇزەتۋ مەكەمەسىندە جازاسىن وتەپ جاتقان "ساياسي تۇتقىن" ارون اتابەكپەن كەزدەسكەن قۇقىق قورعاۋشىلار ونىڭ دەنساۋلىعى تىم ناشارلاپ كەتكەنىن مالىمدەدى. بۇل جونىندە قازاقستانداعى ادام قۇقىعى جونىندەگى حالىقارالىق بيۋرونىڭ رەسمي سايتى جازدى.
بيۋرو سايتىنداعى اقپاراتقا قاراعاندا، كەزدەسۋ بارىسىندا ارون اتابەك قۇقىق قورعاۋشىلارعا دەنساۋلىعىنا بايلانىستى شاعىمدارىن ايتقان.
"ەكى قولىم اۋرادى، جوعارى كوتەرە المايمىن، بۇگىلمەيدى، قالامساپ ۇستاۋدىڭ ءوزى قيىن. اياعىم دا اۋىرادى، كامەرا ىشىندە عانا جۇرەمىن، سەرۋەنگە شىعۋدان باس تارتتىم. تاكسافونعا كولياسكامەن بارامىن. ەتاپتا سوققىعا جىققان كەزدەگى جاراقاتتارىم بولۋ كەرەك. تولىق (مەديتسينالىق-رەد) تەكسەرۋدەن ءوتۋدى ۇسىندى، بىراق مەن ودان باس تارتتىم. سەبەبى مەنىڭ جاسىمدا ساۋلە (وبلۋچەنيە) الۋ قاۋىپتى دەپ ەسەپەيمىن" دەپتى ارون اتابەك وزىمەن كەزدەسكەن قۇقىق قورعاۋشىلارعا.
تۇرمە اكىمشىلىگى ارون اتابەكتىڭ امبۋلاتوريالىق كارتاسىن كورسەتكەن. وندا ول بيىل 4 تامىزدا قان ءاناليزىن تاپسىرۋدان، فليۋروگرافياعا تۇسۋدەن، بۋىندارىن رەنگەنگە تۇسىرۋدەن باس تارتقاندىعى جازىلعان. مەكەمە باسشىسى ءادىلحان قاپىشەۆ ارون اتابەك مەديتسينا قىزمەتكەرلەرىنىڭ باقىلاۋىندا ەكەندىگىن ايتقان.
"№228 مەديتسينالىق حاتتاماسىندا ارون اتابەكتىڭ سۇيەك-بۋىنى اۋىراتىندىعى، ەكى قولىنىڭ دا ساۋساقتارى دەفورماتسيالانعانى، جارتى جىلدان بەرى ءىش قاتۋ سالدارىنان ۇلكەن دارەتكە بارالماي، كليزما الاتىندىعى جانە جۇرگەندە ونەبويى دىرىلدەيتىنى جازىلعان. بۇدان بولەك، حاتتامادا ونىڭ 30.07.2021 جىلى مەديتسينالىق تەكسەرۋدەن باس تارتقانى جونىندە، كەيىننەن تەراپەۆت دارىگەردىڭ تەكسەرۋدى كامەرادا وتكىزگەندىگى جونىندە ايتىلعان. دارىگەر ارون اتابەككە تسەرەبروسكلەروز، ديستسيركۋلياتورلىق ەنتسەفالوپاتيا، ستەنوكارديا، سوزىلمالى گاستريت، سوزىلمالى گەمورروي، قول-اياقتىڭ ارتروزو-ءارتيتتى دياگنوزدارىن قويىپ، جالپى كلينيكالىق اناليز تاپسىرۋعا، ۆيتاميندەر ىشۋگە، نەۆروپاتولوگ پەن كارديولوگقا بارۋعا، ۋزي، وبپ جانە رەنگەنگە ءتۇسۋ كەڭەس بەرگەن. بىراق ارون اتابەك ونىڭ بارلىعىنان باس تارتقان" دەپ جازدى قازاقستانداعى ادام قۇقىعى جونىندەگى حالىقارالىق بيۋرونىڭ رەسمي سايتى.
بيۋرو سايتىنىڭ مالىمەتىنشە، ارون اتابەك مەرزىمىنەن بۇرىن بوساتۋعا ءوتىنىش جازبايتىنىن، ءۇش جىلدان كەيىن بوستاندىققا شىققان سوڭ تولىقتاي وتەماقى تولەتۋگە شاعىمداناتىنىن جەتكىزگەن. بۇعان قوسا مەكەمە باسشىسىنان مەرزىمىنىڭ سوڭىنا دەيىن ەشقايدا اۋىستىرماۋىن سۇراپ، سوڭىنا دەيىن وسى جەردە قالاتىنىن مالىمدەگەن.
68 جاستاعى ارون اتابەك 2006 جىلعى 14 شىلدە كۇنى الماتى ىرگەسىندەگى شاڭىراق ەلدى مەكەنىندە بولعان وقيعادان كەيىن سوتتالعان. سول كۇنى شاڭىراق تۇرعىندارى بيلىك "زاڭسىز سوعىلعان" دەگەن ۇيلەردى بۇزۋعا كەلگەن پوليتسيا كۇشىنە قارسىلىق كورسەتىپ، ەكى جاق اراسىندا قاقتىعىس بولعان. سالدارىنان 24 جاستاعى پوليتسيا وفيتسەرى قازا تاپتى. بيلىك ونىڭ ولىمىنە بىرنەشە جەرگىلىكتى تۇرعىندى جانە سول كۇنى شاڭىراقتا بولعان اقىن ءارى ديسسيدەنت ارون اتابەكتى ايىپتاعان.
سوت ۇكىمى بويىنشا ارون اتابەك 18 جىلعا، قۇرمانعازى وتەگەنوۆ 16 جىلعا، ەرعانات تارانشيەۆ 15 جىلعا، رۇستەم تۇياقوۆ 14 جىلعا سوتتالدى. كەيىنگى ەكەۋى 2018 جىلى مەرزىمىنەن بۇرىن بوساتىلدى. وتەگەنوۆ 2013 جىلى تۇرمە اكىمشىلىگى قىزمەتكەرلەرىنىڭ "زاڭدى تالابىنا باعىنبادى" دەپ ايىپتالىپ، قاماۋ مەرزىمى ەكى جىلعا ۇزارتىلدى.
"شاڭىراق وقيعاسىنان" سوڭ بيلىك ونداعى تۇرعىنداردىڭ جەرى مەن ءۇيىن زاڭداستىرىپ بەرگەن.
سوت ۇكىمى شىققاننان كەيىن ارون اتابەك الماتىدان تىسقارى جەردە بىرنەشە تۇرمەدە قاماۋدا بولدى. قازىر وتىرعان پاۆلودار تەرگەۋ يزولياتورىنا ونى 2014 جىلدىڭ ساۋىرىندە اۋىستىرعان.
شەرزاتتىڭ ءولىمى ىسىنە قاتىستى قۇپيا ۆيدەونى جاريالاۋ كىمگە كەرەك بولدى؟ – ساراپشىلار مەديا سىنى
24 قازان – كىتاپحاناشىلار مەرەكەسى قۇتتى بولسىن!
«ۋچاسكەدەن ارۋاققا كوك حات»: الماتىدا مارقۇمعا كەلگەن شاقىرتۋ
كوميسسيا مەن باقىلاۋشى ەسەبىندەگى ايىرماشىلىق: الماتىدا رەفەرەندۋم قالاي ءوتىپ جاتىر؟
ء"ادىل قازاقستان، ەستيتىن مەملەكەت" ەندى ادۆوكاتتارعا قىسىم جاساي باستادى ما؟
«پسەۆدو-بايقاۋشى» الدە كاسىبي باقىلاۋشى: رەفەرەندۋمدى كىم باقىلايدى؟