Bügin, 15 şildede Şımkenttiñ Qaratau audandıq sotı qalalıq mädeniet üyiniñ jetekşisi, änşi Säken Mayğazievtiñ tirkelmegen "Qazaqstannıñ demokratiyalıq partiyasınıñ" belsendisi Arujan Düysebaevanıñ üstinen tüsirgen şağımı qaray bastadı. Alğaşqı sot otırısı onlayn ötti. İsti sud'ya Mombek Ämirbekov qarap jatır.

Sud'ya sot tergeui bastalmastan bwrın eki jaqtı tatulastıruğa tırıstı, alayda taraptar kelisimge keluden bas tarttı.

Säken Mayğaziev eger jauapker "aqparat dwrıs jetpegendikten" özine negizsiz jala japqanın moyındap, jariya türde keşirim swrasa isti toqtatatının ayttı. Düysebaeva keşirim swraudan bas tartıp, jäbirlenuşiniñ talabın orındamaytının jetkizdi.

Sot tıñdauı kezinde Säken Mayğazievtiñ qorğauşıları sud'yadan is qaralıp bitkenşe BAQ ökilderin aqparat taratpauğa mindetteuin swradı. Biraq sud'ya ötinişti maqwldamadı.

Qoğamda Mayğaziev basqaratın mädeniet üyiniñ Naurız merekesin ötkizuge 595 mln teñge bölgeni qızu talqılanıp jatqanda Arujan Düysebaeva tirkelmegen "Dempartiyanıñ" Youtube video jelisindegi resmi arnasında "Säken Mayğaziev Şımkentte qanşa aqşa tonadı?" degen taqırıpta video jariyalağan. Ol atalğan videoda Mayğaziev basqaratın mekemeniñ Şımkettegi Naurız toyına jartı mlrd teñgeden astam qarjı bölgenin sınap, änşini "jemqor" dep atağan.

"Demokratiyalı Qazaqstan" Youtube arnasında jariyalanğan Arujan Düysebaevanıñ Säken Mayğaziev jaylı videosı. 

Ayıptau şağımına qarağanda, Mayğaziev sol videoda özine qarata aytılğan "jemqor", "Qazaqstandı tonap jatır, öltirip jatır", degen sözder "ar-namısımdı, qadir-qasietimdi, bedelimdi qorladı" dep şağım tüsirgen. Ol ayıptaluşı Düysebaevadan atalğan videonı internetten öşirip, özinen jariya türde keşirim swrauın talap etip otır. Bwğan qosa, Mayğaziev Düysebaevanıñ Qılımıstıq kodekstiñ 131-babı, 2-tarmağı boyınşa jauapqa tartılğanın qalaydı. (Atalğan baptıñ ükimi: Eki jüz aylıq eseptik körsetkişke deyingi mölşerde ayıppwl saluğa ne sol mölşerde tüzeu jwmıstarına ne bir jüz seksen sağatqa deyingi merzimge qoğamdıq jwmıstarğa tartuğa jazalanadı)

Bir kün bwrın Arujan Düysebaeva özine tağılğan ayıptarmen kelispeytinin jetkizip, "565 mln teñgeniñ esebin swrağanım üşin isti boldım, änşiniñ arı taza bolsa, sottasqanşa halıq aldında esep bersin" dep mälimdegen.

Üş jarım ay bwrın memlekettik satıp alu portalındağı resmi derekterdi negizge alğan jurnalister men belsendiler änşi Säken Mayğaziev basqaratın Şımkent qalalıq mädeniet üyiniñ Naurızğa arnalğan is-şaralarğa 595 mln teñge qarjı bölgenin anıqtağan. Sol kezde bwl oqiğa qoğamda ülken şu tudırğan edi. Äkimdik jurnalister keltirgen derekti joqqa şığardı. Olar "Naurızğa tek 213  mln teñge bölingenin, jurnalister keltirgen 595 mln teñge jıl boyı ötetin is-şaralarğa qarastırılğanın" uäj etti. Biraq Şımkent äkimdiginiñ bwl mälimeti memlekettik satıp alu portalındağı resmi derekke qayşı. Öytkeni qalalıq mädeniet üyi türli kompaniyalarmen jasasqan 7 kelisimşartta da is-şaralardıñ Naurız merekesine oray ekeni anıq jazılğan. Bwğan qosa, memsatıp alu portalınan 595 mln teñgeniñ 570 millionnan astamı jeke kompaniyalardıñ şotına audarılıp qoyğanın bayqauğa boladı.

"The Qazaq Times"