Monitoring toptarınıñ mamanı betperde ülestirip twr. Foto: Almatı qalası äkimdiginiñ Baspasöz qızmeti

Almatı qalasında koronavirus indetiniñ törtinşi tolqını ekpindep, auruşañdıq üdeuine baylanıstı köpşilik orındardıñ biri qoğamdıq kölikterdegi betperde rejimin saqtau talabı küşeydi. Maska tağu egde jäne orta jastağı nemese sozılmalı auruı bar azamattardıñ densaulığın saqtaudıñ birden-bir mañızdı amalı.

Mamandar auru köbirek jwğuı mümkin ıqtimal orındar qatarında sauda nısandarı men qoğamdıq kölikter barın aytadı. Bwl jerdegi ıqtimaldıq körsetkişi 16%-dı körsetti. Osı segmentte arnayı monitoringtik toptardıñ jwmısı küşeytildi.

«Särsenbide, bügin sağat 07.00-den bastap qalanıñ barlıq audandarında monitoringtik toptarı qoğamdıq kölik pen avtobus ayaldamaların tekseruge kiristi. Mamandar avtobus-trolleybus jürgizuşileri men jolauşılarınıñ betperde tağıp jüruin qadağalaydı, twrğındarğa tüsindirme jwmısın jürgizedi. ...Betperdeniñ arqasında  basqalarğa auru jwqtıru qaupi edäuir azayadı äri taraluına toqtau bola alamız. İndetke qarsı küreste eñ tiimdi jol – ekpe alu ekenin eske salamız», – delingen äkimdik baspasöz qızmetiniñ habarlamasında.

Resmi mälimdemege qarağanda, tüske deyin 100 şaqtı qoğamdıq kölik tekserilgen.  Olardıñ sapında 1, 98, 32, 123, 79 11, 9, 45, 22, 135, 105, 201, 7, 126, 60, 114, 25, 5, 5B, 29, 65, 37, 205, 224, 20, 148, 38, 62, 210 avtobus marşruttarı bar. Monitoring top mamandarı zañbwzuşılıqtar anıqtalğanın habarladı.

«Tüske deyin 14 azamatqa (jeke twlğağa) qatıstı QR Äkimşilik kodeksiniñ 425-babı 1-böligi boyınşa äkimşilik hattama toltırıldı. Densaulığına baylanıstı negizdi uäji bolmağan jağdayda betperde rejimin bwzğandar äkimşilik jauapkerşilikke tartıladı», – dedi tekseruşi mamandar.

Almatıda indettiñ törtinşi tolqını auır ötip jatır. Epidahual naşarlap, täuligine 1,2 mıñnan asa adamnan koronavirus anıqtaluda. Pandemiya bastalğalı qalada 100 mıñğa tarta (KVI+ 93,5 mı, KVI- 6 mıñ) adam auırğan bolsa, onıñ 17 mıñnan astamı tek osı ayda (biılğı şilde) tirkelgen.

“The Qazaq Times”