اكىمدىك: الماتى قالاسىنىڭ اۆتوبۋستارىندا ماسكا رەجيمى تەكسەرىلەدى

الماتى قالاسىندا كوروناۆيرۋس ىندەتىنىڭ ءتورتىنشى تولقىنى ەكپىندەپ، اۋرۋشاڭدىق ۇدەۋىنە بايلانىستى كوپشىلىك ورىنداردىڭ ءبىرى قوعامدىق كولىكتەردەگى بەتپەردە رەجيمىن ساقتاۋ تالابى كۇشەيدى. ماسكا تاعۋ ەگدە جانە ورتا جاستاعى نەمەسە سوزىلمالى اۋرۋى بار ازاماتتاردىڭ دەنساۋلىعىن ساقتاۋدىڭ بىردەن-ءبىر ماڭىزدى امالى.

ماماندار اۋرۋ كوبىرەك جۇعۋى مۇمكىن ىقتيمال ورىندار قاتارىندا ساۋدا نىساندارى مەن قوعامدىق كولىكتەر بارىن ايتادى. بۇل جەردەگى ىقتيمالدىق كورسەتكىشى 16%-دى كورسەتتى. وسى سەگمەنتتە ارنايى مونيتورينگتىك توپتاردىڭ جۇمىسى كۇشەيتىلدى.

«سارسەنبىدە، بۇگىن ساعات 07.00-دەن باستاپ قالانىڭ بارلىق اۋداندارىندا مونيتورينگتىك توپتارى قوعامدىق كولىك پەن اۆتوبۋس ايالدامالارىن تەكسەرۋگە كىرىستى. ماماندار اۆتوبۋس-تروللەيبۋس جۇرگىزۋشىلەرى مەن جولاۋشىلارىنىڭ بەتپەردە تاعىپ ءجۇرۋىن قاداعالايدى، تۇرعىندارعا تۇسىندىرمە جۇمىسىن جۇرگىزەدى. ...بەتپەردەنىڭ ارقاسىندا  باسقالارعا اۋرۋ جۇقتىرۋ قاۋپى ەداۋىر ازايادى ءارى تارالۋىنا توقتاۋ بولا الامىز. ىندەتكە قارسى كۇرەستە ەڭ ءتيىمدى جول – ەكپە الۋ ەكەنىن ەسكە سالامىز»، – دەلىنگەن اكىمدىك ءباسپاسوز قىزمەتىنىڭ حابارلاماسىندا.

رەسمي مالىمدەمەگە قاراعاندا، تۇسكە دەيىن 100 شاقتى قوعامدىق كولىك تەكسەرىلگەن.  ولاردىڭ ساپىندا 1, 98, 32, 123, 79 11, 9, 45, 22, 135, 105, 201, 7, 126, 60, 114, 25, 5, 5ب، 29, 65, 37, 205, 224, 20, 148, 38, 62, 210 اۆتوبۋس مارشرۋتتارى بار. مونيتورينگ توپ ماماندارى زاڭبۇزۋشىلىقتار انىقتالعانىن حابارلادى.

«تۇسكە دەيىن 14 ازاماتقا (جەكە تۇلعاعا) قاتىستى قر اكىمشىلىك كودەكسىنىڭ 425-بابى 1-بولىگى بويىنشا اكىمشىلىك حاتتاما تولتىرىلدى. دەنساۋلىعىنا بايلانىستى نەگىزدى ءۋاجى بولماعان جاعدايدا بەتپەردە رەجيمىن بۇزعاندار اكىمشىلىك جاۋاپكەرشىلىككە تارتىلادى»، – دەدى تەكسەرۋشى ماماندار.

الماتىدا ىندەتتىڭ ءتورتىنشى تولقىنى اۋىر ءوتىپ جاتىر. ەپيداحۋال ناشارلاپ، تاۋلىگىنە 1,2 مىڭنان اسا ادامنان كوروناۆيرۋس انىقتالۋدا. پاندەميا باستالعالى قالادا 100 مىڭعا تارتا (كۆي+ 93,5 مى، كۆي- 6 مىڭ) ادام اۋىرعان بولسا، ونىڭ 17 مىڭنان استامى تەك وسى ايدا (بيىلعى شىلدە) تىركەلگەن.

“The Qazaq Times”