Jalaqını ösirudi talap etip, ereuildetip jatqan "Mwnaytehsnab" jwmısşıları. Jañöazen, 19 şilde 2021 jıl. Foto: Azattıq radiosı/Manas Qayırtaywlı

21 şildede Jañaözen qalasında tağı üş mekeme jwmısşıları ereuilge şıqtı. Olardıñ da talabı – eñbek jağdayın jaqsartıp, jalaqını köteru. Qazir Jañaözende ereuildep twrğan mekeme sanı – altau. Bwl jaylı Azattıq radiosı habarladı. 

Sayt aqparatına qarağanda, 21 şildede memlekettik "Özenmwnaygaz" kompaniyasınıñ mwnay-gaz öndiru basqarmasına eden juıp, vahterlıq qızmet körsetetin NBKS mekemesiniñ jwmısşıları jwmıstı toqtatqan. Onda jwmıs isteytin köp balalı, jalğızbastı jäne mügedek bala tärbielep otırğan äyelder äleumettik jelide videomälimdeme jasap, jwmıs jağdayınıñ naşarlığına şağımdandı.

"Jwmısşılar "Özenmwnaygazdıñ" qwrılımdıq mekmelerindegi öndiriste jwmıs isteydi. Tüski as işuge qalağa keluge mümkindigi joq. Mwnayşılarmen birge ziyandı radiaciya jwtıp jwmıs isteymiz, biraq ol üşin ne tüski as, ne süt berilmeydi, ziyandılıq koefficienti de qarastırılmağan. Öñirde azıq-tülik qımbat bolğandıqtan, alatın aylıq künköriske äreñ jetedi. Bala-şağanı mektepke dayındau, kiindiru jäne basqa twrmıstıq şığındardı öteu qiındıq tudırıp, jalğızbastı analar jetispeuşilik tauqımetin tartıp otır" dep mälimdedi videoda ereuilşiler atınan söylegen äyel.

Olar jwmıs beruşiden jalaqını eki ese köbeytip, ziyandı jwmıs üşin qosımşa aqı töleudi, eñbek demalısına aqşanı köbeytudi, zañdı merekelerde sıyaqı men emge aqşa töleudi, tüski aspen qamtamasız etip, materialdıq kömek körsetudi talap etedi.

Jañaözendegi Oilfield equipment and services jäne "Aqtau mwnay servis kompaniyası" jauapkerşilig şekteuli seriktestikteri jwmısşıları da jwmıstı toqtattı.

Olar birlesip, jwmıs beruişiniñ atına segiz wjımdıq talap joldağan. Onda:

  • Jeke eñbek şartın jasaudı
  • Wjımdıq şart jasasudı
  • Eñbekaqını 100 payız köterudi
  • Mwnayşılar jäne Täuelsizdik merekesine sıyaqı töleudi
  • Aymaqtıq, salalıq koefficient töleudi
  • Jıl soñında 13-jalaqı töleudi
  • Käsipodaqtı qudalaudı toqtatudı
  • Jwmıstan şığarılğan käsipodaq müşeleri men törağasın jwmısqa keri aludı talap etedi.

Jañaözendegi "Aqtau mwnay servis kompaniyası" jwmısşıları talabın kompaniyanıñ Soltüstik Bwzaşı, Qalamqas kenişteri men Jetibaydağı filialdarı jwmısşıları da qoldap, jwmıstı toqtattı dedi.

Jañaözende Kunan holding jauapkerşiligi şeketuli seriktestigi jürgizuşileriniñ 19 şildede bastalğan ereuili äli jalğasıp jatır. Mekemede on jıldan beri jürgizuşi bolıp jwmıs isteytin Baqtığali Säbiovtıñ aytuınşa, mekeme basşılığı jürgizuşiler talabın orındaudıñ orınına 60 adamdı jwmıstan qısqartqan.

Jañaözendegi "Batısgeofizservis" ben "MwnaySpecSnab kompani" jwmısşılarınıñ talabı da orındalmay, ereuil biraz künnen beri jalğasıp jatır. Jwmısşılar jalaqını ösirudi, aqılı eñbek demalısın zañdı türde keste boyınşa naqtı bekitip, ereuildegen jwmısşılardı qudalamaudı talap etken.

"The Qazaq Times"