Belsendi Erjan Elşibaev. Foto: Facebook.com

Qızılordadağı ZK-169/5 mekemesinde jazasın ötep jatqan "sayasi twtqın" Erjan Elşibaev qarsılıq retinde özin jaraqattağan. 16 şildege qarağan tüni auruhanada onıñ asqazanına operaciya jasaldı. Bwl turalı qızılordalıq belsendilerdiñ sözine süyengen Azattıq radiosı habarladı. 

Belsendi Mwratbek Baymağambetovtıñ Azattıqqa aytuına qarağanda, mausım ayınıñ soñında türme äkimşiligi Elşibaevtı "burbarak" dep atalatın tärtibi qatañ barakqa "rejimdi qasaqana bwzuşı" retinde qamağan. Belsendi "qwzırlı organdardıñ qitwrqı äreketi" onı öz-özine qol saluğa itermelegen boluı mümkin dep topşılaydı.

"Negizi adamnıñ özine qol saluı oñay närse emes qoy. Äbden aşınğan adam ğana oğan amalsızdan baradı. Negizi keşe onıñ merziminen bwrın bosatu jöninde ötinişi qaraluı tiis edi. Qaralğanı-qaralmağanı belgisiz. Endi sol qwzırlı organdardıñ qitwrqı äreketteri onı mäjbürli türde özine qol saluğa itermelep otır" dedi Baymağambetov.

Aqparatqa qarağanda, onımen birge tağı bir sottaluşı da "türme äkimşiliginiñ zañsız äreketterine qarsılıq retinde" özine qol salğan. Qazir olardıñ jağdayı belgisiz.

Türme äkimşiligi bwl oqiğa jaylı äli resmi aqparat taratqan joq.

Bir apta bwrın da Elşibaev täuelsiz basılımdardı beruden bas tartqan türme äkimşiliginiñ äreketine qarsılıq retinde qolın tikken edi.Sol kezde Qızılorda oblısınıñ QAJD äueli aqparattı teristep, artınşa rastağan. Departament sol kezde Elşibaevtıñ tärtibin "naşar", minez-qwlqın "teris" dep sipattağan.

Erjan Elşibaev – Jañaözendegi jwmıssızdıq mäselesin kötergen belsendi. 2019 jılı qazan ayında Jañaözen sotı onı 5 jılğa bas bostandığınan ayırğan.

Elşibaevtıñ özi jäne qwqıq qorğauşılar, jaqtastarı istiñ sayasi astarı bar dep sanaydı. Elşibaevtıñ isin saraptağan qwqıq qorğauşılar onı "sayasi twtqın" dep atağan.

"The Qazaq Times"