Белсенді Ержан Елшібаев. Фото: Facebook.com

Қызылордадағы ЗК-169/5 мекемесінде жазасын өтеп жатқан "саяси тұтқын" Ержан Елшібаев қарсылық ретінде өзін жарақаттаған. 16 шілдеге қараған түні ауруханада оның асқазанына операция жасалды. Бұл туралы қызылордалық белсенділердің сөзіне сүйенген Азаттық радиосы хабарлады. 

Белсенді Мұратбек Баймағамбетовтың Азаттыққа айтуына қарағанда, маусым айының соңында түрме әкімшілігі Елшібаевты "бурбарак" деп аталатын тәртібі қатаң баракқа "режимді қасақана бұзушы" ретінде қамаған. Белсенді "құзырлы органдардың қитұрқы әрекеті" оны өз-өзіне қол салуға итермелеген болуы мүмкін деп топшылайды.

"Негізі адамның өзіне қол салуы оңай нәрсе емес қой. Әбден ашынған адам ғана оған амалсыздан барады. Негізі кеше оның мерзімінен бұрын босату жөнінде өтініші қаралуы тиіс еді. Қаралғаны-қаралмағаны белгісіз. Енді сол құзырлы органдардың қитұрқы әрекеттері оны мәжбүрлі түрде өзіне қол салуға итермелеп отыр" деді Баймағамбетов.

Ақпаратқа қарағанда, онымен бірге тағы бір сотталушы да "түрме әкімшілігінің заңсыз әрекеттеріне қарсылық ретінде" өзіне қол салған. Қазір олардың жағдайы белгісіз.

Түрме әкімшілігі бұл оқиға жайлы әлі ресми ақпарат таратқан жоқ.

Бір апта бұрын да Елшібаев тәуелсіз басылымдарды беруден бас тартқан түрме әкімшілігінің әрекетіне қарсылық ретінде қолын тіккен еді.Сол кезде Қызылорда облысының ҚАЖД әуелі ақпаратты терістеп, артынша растаған. Департамент сол кезде Елшібаевтың тәртібін "нашар", мінез-құлқын "теріс" деп сипаттаған.

Ержан Елшібаев – Жаңаөзендегі жұмыссыздық мәселесін көтерген белсенді. 2019 жылы қазан айында Жаңаөзен соты оны 5 жылға бас бостандығынан айырған.

Елшібаевтың өзі және құқық қорғаушылар, жақтастары істің саяси астары бар деп санайды. Елшібаевтың ісін сараптаған құқық қорғаушылар оны "саяси тұтқын" деп атаған.

"The Qazaq Times"