Jañaözen oqiğası kezinde policiya tepkisinen qaza bolğan Bazarbay Kenjebaevtıñ  wlı Ğalımjan Kenjebaev köz jwmdı. Bwl aqparttı bügin, 1 şildede "Dempartiya" jetekşisi Janbolat Mamay Facebook parağında habarladı.

Mamaydıñ jazuına qarağanda, 34 jastağı Ğalımjan Kenjebaev auruhanadan policiya alıp ketken soñ qaytıs bolğan.

"Bizge habarlağanday, ötken aptada Jañaözende 34 jastağı Ğalımjandı belgisiz adamdar soqqığa jıqqan. Ol auruhanağa jetkizilip, operaciya jasalğan. Därigerler Ğalımjannıñ otbası men tanıstarına onıñ auruhanağa tüskenin, oğan ota jasalğanın aytpağan. Ğalımjannıñ bası otadan äli jazılmağan jeksenbi küni policiya kuälik beru üşin uçaskege alıp barğan. Al policiya bölimşesine jetkizilgen Ğalımjan Kenjebaev biraz uaqıttan keyin qaytıs bolğan" dep jazdı Janbolat Mamay.

Mañğıstau oblıstıq policiya departamenti bwl oqiğa jaylı resmi aqparattı keyin habarlaytının ayttı.

Ğalımjan Kenjebaevtıñ äkesi - Jañaözen oqiğası kezinde qaytıs bolğan Bazarbay Kenjebaev. Ol 2011 jıldıñ 16 jeltoqsanında Jañaözenge kezdeysoq barğan. Sol küni ol alañdağı mwnayşılarmen birge wstalıp, tergeu abaqtısında bir kün boyı ayausız soqqığa jığılğan. Jeltoqsannıñ 17-sinde abaqtıdan bosğan. Al jeltoqsannıñ 21-i küni ol auır soqqıdan alğan jaraqatınan qaytıs bolğan.

«Bazarbay Kenjebaev tergeu abaqtısında alğan auır jaraqattan qaytıs boldı» degen jwrtqa belgili jayttı bilik äueli teristedi. Biraq keyin tergeu abaqtısınıñ bastığı Bazarbay Kenjebaevqa tiisti medicinalıq kömek körsetu üşin äreket etpedi dep qana moyındadı. Aqırı policiyanıñ jas oficeri, leytenant Jeñisbek Temirov bes jılğa sottaldı, biraq ol 2014 jıldıñ kökteminde merziminen bwrın şarttı jazamen bosap şıqtı.

"The Qazaq Times"