عالىمجان كەنجەباەۆ. سۋرەت facebook جەلىسىندەگى جەكە پاراعىنان الىندى

جاڭاوزەن وقيعاسى كەزىندە پوليتسيا تەپكىسىنەن قازا بولعان بازارباي كەنجەباەۆتىڭ  ۇلى عالىمجان كەنجەباەۆ كوز جۇمدى. بۇل اقپارتتى بۇگىن، 1 شىلدەدە "دەمپارتيا" جەتەكشىسى جانبولات ماماي Facebook پاراعىندا حابارلادى.

مامايدىڭ جازۋىنا قاراعاندا، 34 جاستاعى عالىمجان كەنجەباەۆ اۋرۋحانادان پوليتسيا الىپ كەتكەن سوڭ قايتىس بولعان.

"بىزگە حابارلاعانداي، وتكەن اپتادا جاڭاوزەندە 34 جاستاعى عالىمجاندى بەلگىسىز ادامدار سوققىعا جىققان. ول اۋرۋحاناعا جەتكىزىلىپ، وپەراتسيا جاسالعان. دارىگەرلەر عالىمجاننىڭ وتباسى مەن تانىستارىنا ونىڭ اۋرۋحاناعا تۇسكەنىن، وعان وتا جاسالعانىن ايتپاعان. عالىمجاننىڭ باسى وتادان ءالى جازىلماعان جەكسەنبى كۇنى پوليتسيا كۋالىك بەرۋ ءۇشىن ۋچاسكەگە الىپ بارعان. ال پوليتسيا بولىمشەسىنە جەتكىزىلگەن عالىمجان كەنجەباەۆ ءبىراز ۋاقىتتان كەيىن قايتىس بولعان" دەپ جازدى جانبولات ماماي.

ماڭعىستاۋ وبلىستىق پوليتسيا دەپارتامەنتى بۇل وقيعا جايلى رەسمي اقپاراتتى كەيىن حابارلايتىنىن ايتتى.

عالىمجان كەنجەباەۆتىڭ اكەسى - جاڭاوزەن وقيعاسى كەزىندە قايتىس بولعان بازارباي كەنجەباەۆ. ول 2011 جىلدىڭ 16 جەلتوقسانىندا جاڭاوزەنگە كەزدەيسوق بارعان. سول كۇنى ول الاڭداعى مۇنايشىلارمەن بىرگە ۇستالىپ، تەرگەۋ اباقتىسىندا ءبىر كۇن بويى اياۋسىز سوققىعا جىعىلعان. جەلتوقساننىڭ 17-سىندە اباقتىدان بوسعان. ال جەلتوقساننىڭ 21-ءى كۇنى ول اۋىر سوققىدان العان جاراقاتىنان قايتىس بولعان.

«بازارباي كەنجەباەۆ تەرگەۋ اباقتىسىندا العان اۋىر جاراقاتتان قايتىس بولدى» دەگەن جۇرتقا بەلگىلى جايتتى بيلىك اۋەلى تەرىستەدى. بىراق كەيىن تەرگەۋ اباقتىسىنىڭ باستىعى بازارباي كەنجەباەۆقا ءتيىستى مەديتسينالىق كومەك كورسەتۋ ءۇشىن ارەكەت ەتپەدى دەپ قانا مويىندادى. اقىرى پوليتسيانىڭ جاس وفيتسەرى، لەيتەنانت جەڭىسبەك تەمىروۆ بەس جىلعا سوتتالدى، بىراق ول 2014 جىلدىڭ كوكتەمىندە مەرزىمىنەن بۇرىن شارتتى جازامەن بوساپ شىقتى.

"The Qazaq Times"