"MwnaySpecSnabkompani" jwmısşıları bilikke videomälimdeme jasap twr. 15 şilde 2021 jıl. Skrinşot.

Jañaözende jalaqını ösirip, eñbek jağdayın jaqsartudı talap etken ereuilder köbeydi. Beysenbide "MwnaySpecSnabkompani" mekemesiniñ jürgizuşileri osınday talappen ereuilge şıqtı. Bwl turalı Azattıq radiosı habarladı. 

Azattıqtıñ jazuınşa, jürgizuşiler 15 şildeden beri jwmısqa şıqpağan.

Olar prezident Qasım-Jomart Toqaev, prem'er-ministr Asqar Mamin, "Qazmwnaygaz" wlttıq kompaniyası basqarma törağası Alik Aydarbaev, Mañğıstau oblısı äkimi Serikbay Twrımov, Jañaözen qalasınıñ äkimi Maqsat Ibağarov, "MwnaySpecSnab Kompani" jauapkerşiligi şekteuli seriktestigi direktorı Erlan Säbievke joldağan arızdarın video arqılı bayandap, äleumettik jelilerde tarattı. Onda jwmısşılar bilikten mekemedegi "zañsız äreketterge" nazar audarudı swrağan.

Jwmısşılardıñ arızında 11 talap jazılğan. Arasında tömendegidey punkter de bar: jalaqını 100 payızğa ösiru, Eñbek kodeksiniñ 22 babınıñ 1-tarmağına säykes, öndiristik mwnay, gaz, kömirsutek gazı jäne özge de densaulıqqa ziyan keltiretin aymaqta jwmıs istegendikten ötemaqı töleu, eñbekke uaqıtşa jaramsızdıq boyınşa järdemaqı töleu, 24 sağattıq jwmıs auısımın toqtatıp, eñ köp degende 12 sağattıq jwmıs auısımın wyımdastıru, tehnikalardı jöndeu kezinde jwmısqa şıqqan uaqıttı esepke alu siyaqtı talaptar bar.

"MwnaySpecSnabkompani" jauapkerşiligi şekteuli seriktestigi - "QazMwnayGazdıñ" enşiles kompaniyaları "ÖzenMwnayGaz" AQ men "Özenmwnayservis" mekemesine merdigerlik qızmet körsetedi. Ol auır jük kölikterin, arnayı tehnikalar men jeñil kölikterdi jalğa berumen aynalısadı. "MwnaySpecSnabkompaniya" jürgizuşileri biıl aqpan ayında da tariftik stavkanı köterudi talap etip, ereuilge şıqqan edi.

Qazir Jañaözende "KMG-Security" kompaniyası jwmısşılarınıñ ereuili jalğasıp jatır. Olar da negizinen jalaqı ösirudi talap etip otır.

"The Qazaq Times"