AQŞ-tıñ Auğanstandağı äskeri qolbasşısı eldegi qauipsizdik jağdayına alañdauşılıq bildirdi. Azamattıq soğıs qaupine qaramastan NATO men AQŞ elden äsker şegindiruin 11 qırküyekke deyin tolıq jüzege asırmaq.

AQŞ-tıñ Auğanstandağı äskeri qolbasşısı  Ostin Skott Miller (Austin Scott Miller) seysenbi küni aqparat qwraldarına «Auğanstannıñ qauipsizdik jağdayı öte naşar küyde» dep mälimdedi. Onıñ aytuınşa, AQŞ pen NATO äskeri şeginudi bastağan 1 mamırdan beri «Taliban» wyımı eldegi 419 äkimşilik aymaqtıñ 100-den astamın baqılauına alıp ülgirgen.

Degenmen, Auğanstannıñ ükimet küşteri de küresti tabandı jalğastırıp jatır. Tälipter basıp alğan birqatar äkimşilik aymaqtardı qaytarıp aldı. Aldağı uaqıtta «Taliban» wyımınıñ baqılauındağı audandardı bosatuğa uäde berip otır.

Şeteldik aqparat agenttikteriniñ Auğanstan turalı aqparattarına nazar audaratın bolsañız köbine köp «Taliban» qozğalısınıñ audandardı, provinciya ortalıqtarın basıp alıp jatqanı aytıladı. Al, Auğanstan qauipsizdik küşteriniñ qaytarıp alğanı turalı habarlar köp aytılmaydı. Osınıñ özinen Auğanstandağı jağdaydı bwrmalauğa dayın twrğan şeteldik küşterdiñ bar ekenin körsetedi. Ärine, bwl Auğanstandağı jağdaydıñ qauipti ekenin joqqa şığaru emes, aqparattardan eldegi naqtı jağdaydı tanu üşin asa saqtıq ta qajet bolatınday.

Auğanstannıñ ükimeti men «Taliban» arasında azamattıq soğıstıñ boluı mümkindigi joğarı. Biraq, Miller sözinde «prezident Baydenniñ bwyrığın özgerissiz orındaytının» ayttı. Säuirde Bayden Auğanstandağı äskerlerdi 11 qırküyekke deyin elge qaytaru turalı bwyrıq bergen bolatın.

“The Qazaq Times”