اقش اسكەري قولباسشىسى اۋعانستانداعى جاعدايدان الاڭداپ وتىر

اقش-تىڭ اۋعانستانداعى اسكەري قولباسشىسى ەلدەگى قاۋىپسىزدىك جاعدايىنا الاڭداۋشىلىق ءبىلدىردى. ازاماتتىق سوعىس قاۋپىنە قاراماستان ناتو مەن اقش ەلدەن اسكەر شەگىندىرۋىن 11 قىركۇيەككە دەيىن تولىق جۇزەگە اسىرماق.

اقش-تىڭ اۋعانستانداعى اسكەري قولباسشىسى  وستين سكوتت ميللەر (Austin Scott Miller) سەيسەنبى كۇنى اقپارات قۇرالدارىنا «اۋعانستاننىڭ قاۋىپسىزدىك جاعدايى وتە ناشار كۇيدە» دەپ مالىمدەدى. ونىڭ ايتۋىنشا، اقش پەن ناتو اسكەري شەگىنۋدى باستاعان 1 مامىردان بەرى «تاليبان» ۇيىمى ەلدەگى 419 اكىمشىلىك ايماقتىڭ 100-دەن استامىن باقىلاۋىنا الىپ ۇلگىرگەن.

دەگەنمەن، اۋعانستاننىڭ ۇكىمەت كۇشتەرى دە كۇرەستى تاباندى جالعاستىرىپ جاتىر. تالىپتەر باسىپ العان بىرقاتار اكىمشىلىك ايماقتاردى قايتارىپ الدى. الداعى ۋاقىتتا «تاليبان» ۇيىمىنىڭ باقىلاۋىنداعى اۋدانداردى بوساتۋعا ۋادە بەرىپ وتىر.

شەتەلدىك اقپارات اگەنتتىكتەرىنىڭ اۋعانستان تۋرالى اقپاراتتارىنا نازار اۋداراتىن بولساڭىز كوبىنە كوپ «تاليبان» قوزعالىسىنىڭ اۋدانداردى، پروۆينتسيا ورتالىقتارىن باسىپ الىپ جاتقانى ايتىلادى. ال، اۋعانستان قاۋىپسىزدىك كۇشتەرىنىڭ قايتارىپ العانى تۋرالى حابارلار كوپ ايتىلمايدى. وسىنىڭ وزىنەن اۋعانستانداعى جاعدايدى بۇرمالاۋعا دايىن تۇرعان شەتەلدىك كۇشتەردىڭ بار ەكەنىن كورسەتەدى. ارينە، بۇل اۋعانستانداعى جاعدايدىڭ قاۋىپتى ەكەنىن جوققا شىعارۋ ەمەس، اقپاراتتاردان ەلدەگى ناقتى جاعدايدى تانۋ ءۇشىن اسا ساقتىق تا قاجەت بولاتىنداي.

اۋعانستاننىڭ ۇكىمەتى مەن «تاليبان» اراسىندا ازاماتتىق سوعىستىڭ بولۋى مۇمكىندىگى جوعارى. بىراق، ميللەر سوزىندە «پرەزيدەنت بايدەننىڭ بۇيرىعىن وزگەرىسسىز ورىندايتىنىن» ايتتى. ساۋىردە بايدەن اۋعانستانداعى اسكەرلەردى 11 قىركۇيەككە دەيىن ەلگە قايتارۋ تۋرالى بۇيرىق بەرگەن بولاتىن.

“The Qazaq Times”