QazVac vakcinası. Foto: https://www.gov.kz/

Qazaqstanda koronavirusqa qarsı tağı bir ekpe - QazCoVac-P vakcinasınıñ klinikalıq sınağı bastaldı. Bwl aqparattı bilim jäne ğılım ministrligine qarastı Biologiyalıq qauipsizdik problemalarınıñ ğılımi-zertteu institutı habarladı.

Aqparatqa qarağanda, sınaqtıñ birinşi jäne ekinşi kezeñi Tarazdağı köpsalalı qalalıq auruhanada ötip, oğan 18-50 jastağı eriktiler qatısadı.

Institut sınaq kezeñine qanşa adam qatısatının jariyalamağan, biraq bwl ekpe klinikalıq sınaqqa deyin januarlarğa jasalğan tekseris kezinde "jaqsı nätije körsetkenin" mälimdedi. Ekpeni sınaqtan ötkizuge densaulıq saqtau ministrligi rwqsat bergeni de habarlandı.

Instituttıñ dereginşe, QazCoVac-P – SARS-CoV-2 koronavirusınıñ jasandı sintezdelgen aquızdarı negizinde jasalğan subbirlikti vakcina.

"Qauipsiz ekpe alu üşin aquızdar tolıq tazartu kezeñinen jäne tekseristen ötti. Ekpeniñ qwramında virustıñ özi joq. Subbirlikti vakcina inaktivtelgen ekpeler siyaqtı qwramında tiri patogen komponentteri joq äri öte qauipsiz" deydi mekeme.

Qazaqstan 26 säuirde, sınaqtıñ tolıq üş kezeñi ayaqtalmay jatıp, QazVac (tağı bir atauı - Qaz-Covid-in) ekpesin halıqqa jappay ege bastağan. Bwl ekpeni de Biologiyalıq qauipsizdik problemalarınıñ ğılımi-zertteu institutı dayındağan. Densaulıq saqtau ministrligi QazVac sınaqtıñ eki kezeñinen keyin 96 payız degen edi. Biraq bwl ekpeniñ sınaq kezeñi jaylı ğılımi jurnaldarda äli maqala jariyalanğan joq.

"The Qazaq Times"