NATO Bas hatşısı Yens Stoltonberg. Foto: BBC

Bwdan bir-eki jıl Soltüstik Atlantikalıq Qauipsizdik Odağınıñ 70 jıldığına oray wyımnıñ bolaşağına degen kümän-küdik küşeyip, işki twtastığına qatıstı sın-pikir küşeyip twrğan edi. AQŞ-tıñ bwrınğı prezidenti Donal'd Tramp NATO-nıñ ikemdiligin jii sınap, tipti, qajeti qalmağan wyım dep te aytqanı bar. Alayda, bıltırdan beri, äsirese AQŞ-tıñ jaña adminstraciyasına ilese, NATO wyımınıñ işinde de birqatar tıñ serpinder payda boldı. Wyımnıñ kezekti sammiti älemniñ nazarın özine audardı.

Bel'giyada ötken kezekti jinalısta NATO-ğa müşe elderdiñ basşıları Qıtaydıñ ösip kele jatqan äskeri qaterimen qatar, kiber qauipsizdik salasına töngen jaña qaterler turalı talqıladı. Bwl jolı sammit köpke sozılğan joq, bar joğı birneşe sağatta bitti. Biraq, wyımnıñ bas hatşısı bastap, özge de sarapşılar jağınan qazirgi jahandıq jağdaylardan alğanda kezekti jiın asa mañızdı mänge ie boldı dep bağaladı.

Sammitte belgili bolğanınday, NATO-nıñ negizgi maqsattarınıñ biri retinde Qıtaydıñ artıp kele jatqan qaterine qarsı äreket etu qosıldı. Bas hatşısı Yens Stoltenberg te mälimdemesinde: «NATO köp memleketterge qorqınış alıp kelip jatqan Qıtaydıñ ıqpalına qarsı twruı kerek», – dedi. Wyım endigi jerde müşe eldermen osı wstanımdı tereñdetu bağıtında jwmıs alıp baradı.

NATO eñ aldımen Qıtaydıñ artıp kele jatqan äskeri quatınan alañdaydı. Soğan qosa, onıñ kommunistik jüyesiniñ wyımğa müşe elderdiñ demokratiyalıq jüyelerine qauip töndiredi dep sanaydı. Qıtaydıñ soñı jıldarı belsendi äskeri jañaruı, teñiz küşteriniñ tañqalarlıq tez küşeyui, şetelderlen äskeri bazalar qwra bastauı älem elderin alañdatıp otır. Onıñ üstine NATO Qıtay jäne Resey sındı negizgi qarsılastarınıñ birigip ketuinen alañdaydı.

Ärine, älemdegi eñ iri qauipsizdik wyımı sanalatın NATO Reseydiñ de äskeri qadamdarına asa saqtıqpen qarap otır. Aytalıq, kezekti sammit kezinde Yens Stoltenberg Reseydiñ Siriya men Liviyağa zımırandarın ornalastırıp jatqanın mälimdedi. Onıñ aytuınşa Belarus' men Taulı Qarabaq mäselesinen keyin Resey äskeri äreketterin küşeytken.

“The Qazaq Times”