Qazaqstannıñ bwrınğı jäne qazirgi aqparat ministrleri – Aida Balaeva men Däuren Abaev. «Ädil söz» söz bostandığın qorğauğa arnalğan halıqaralıq qor Abaevtan Balaevağa jalğasqan zañ jobasınıñ jay-japsarın swradı.

«Ädil söz» söz bostandığın qorğau halıqaralıq qorı aqparat ministri Aida Balaevadan eks-ministr Abaevtan qalğan, büginde iz-habarsız «işinen tınıp jatqan» vedomstvonıñ bwqaralıq aqparattı äzirleu men taratudı retteytin jaña zañ jobasınıñ dayındıq barısın jäne oğan qatıstırudı swradı. Azamattıq qoğamdı damıtu jäne onı eldiñ sayasi ömirine etene qatıstıru turalı jii aytatın ministrlik atalğan zañ jobasın «jwmbaqtap» otır. Qazirgi tañdağı jwmıs tobı men process qay kezeñde jürip jatqanı jaylı derek joqtıñ qası.

«Ädil söz» qorı swrau-mälimdemesinde 2017 jılğı qaraşada sol kezdegi aqparat ministri lauazımında bolğan Däuren Abaev keler jılı (2018 jıl – QT) BAQ qızmetin retteytin müldem jaña zañ äzirlenetinin habarlağanın eske aladı. Abaev bwl zañ jobasınıñ bir emes, 2-3 jılda dayındalatının aytqan.

Qor dereginşe, tört jıl bwrın «Ädil söz» ministrlikke jaña zañ jobasın äzirleuge atsalısu äri ıntımaqtastıq jöninde wsınıspen jügingen. 2018 jılğı qañtar ayında sol twstağı vice-ministr Alan Äjibaev öz atınan «vedomstvo aqparat salasındağı jaña zañ jobasın äzirleu bastalarda mindetti türde habarlaymız» dep uäde berip, jauap hat joldağan.

Bwğan deyin 2018 jıldıñ soñına qaray ministrliktiñ BAQ salasındağı memlekettik sayasat departamenti direktorı Bekzat Rahimov «Media qwrıltayda» söylegen sözinde: «Bwl jaña zañ boladı. Biz qoğamğa tanıstıru nwsqaları jöninde zerttedik. «BAQ turalı» jaña zañ bola ma, älde ol qoldanıstağı zañdardı biriktire me? Aqparat salası boyınşa birizdendirilgen zañ, onda BAQ mäselelerine arnalğan jekelegen taraular bolmaq» degen edi.

«Arada birşama jıl ötti. Prezident halıq ünine qwlaq asatın memleket sayasatın jariyalap, däyekti jürgizip keledi. Onıñ azamattıq qoğamdı adam qwqıqtarı salasındağı zañ şığaru procesine tartu turalı talabı köp märte aytıldı. Alayda bwğan azamattıq qoğam men tilşiler qauımın qatıstırmaq tügili jaña zañ jobasınıñ jwmısı turalı äli künge deyin birde-bir aqparat jariyalanbağan. Sonımen qatar, basqa da memlekettik mekmeler, atap aytqanda, Cifrlıq damu ministrligi jurnalisterdiñ qwqığı men söz bostandığın negizsiz şekteytin zañnamalıq jañalıqtardı wsınıp keled», – delingen wyım mälimdemesinde.

Osığan baylanıstı «Ädil söz» tağdırı jwmbaq zañ jobasın dayındau jolında jariyalılıq-aşıqtıq jäne ıntımaqtastıq tanıtudı swraydı. Sonday-aq, eñ bastısı, qoğamnıñ wyımdıq ökili retinde  osı bağıtta kömektesuge tas-tüyin dayın ekenin mälimdeydi.

"The Qazaq Times"