Qazaqstanda joğarı bilimi men täjiribesi joq jastar qılmısqa baradı nemese masıl boladı. Qazaqstan prezidenti äkimşiligi jetekşisiniñ birinşi orınbasarı Däuren Abaev memlekettik "Habar" arnasındağı "Otkrıtıy dialog 2.0" bağdarlamasına bergen swhbatında osılay dedi.

"Bizde mektep bitirgen soñ memlekettiñ nazarına ilinbey qalatın jastar bar. Olar mektepti naşar oqığandıqtan joğarğı oqu ornına tüse almaydı. Joğarı bilimi, täjiribesi bolmağandıqtan olardı jwmısqa almaydı. Olar ne isteydi? Qılmısqa baradı ya masıl boladı" dedi ol 2 qırküyekte.

Abaev osı sözdi aytardan bir kün bwrın, yağni, 1 qırküyekte Qazaqstan prezidenti Qasım-Jomart Toqaev ta joldauında elde "äleumettik bağdarlamalardı jeke müddesine paydalanatın" adamdar barın aytıp, "masıldıqtı" sökken.

"Qoğamda paternalistik köñil-küy jäne äleumettik masıldıq ürdisi beleñ aldı. El işinde äleumettik bağdarlamalardı jeke müddesine paydalanatındar az emes. Onday adamdar kez kelgen örkenietti eldegi siyaqtı zañnıñ jäne bükil qoğamnıñ aldında jauap berui kerek" degen edi Toqaev.

Qazaqstan şeneunikteri keyingi kezde "halıq arasındağı masıldıq" turalı köp aytıp, memleketten äleumettik kömek talap etkenderdi jii sınaytın boldı. Mäselen, 2019 jılı tamızda Qazaqstannıñ eks-prezidenti Nwrswltan Nazarbaev özi basqaratın "Nwr Otan" partiyasınıñ jiınında memleket kömegine iek aratqandardı "masıldıq közqarastan arıluğa şaqırğan". Onıñ "eki siır satıp al da, öziñdi asıra" degen sözi qoğam aşuın tuğızğan.

The Qazaq Times