قازاقستاننىڭ بۇرىنعى جانە قازىرگى اقپارات مينيسترلەرى – ايدا بالاەۆا مەن داۋرەن اباەۆ. «ءادىل ءسوز» ءسوز بوستاندىعىن قورعاۋعا ارنالعان حالىقارالىق قور اباەۆتان بالاەۆاعا جالعاسقان زاڭ جوباسىنىڭ جاي-جاپسارىن سۇرادى.

«ءادىل ءسوز» ءسوز بوستاندىعىن قورعاۋ حالىقارالىق قورى اقپارات ءمينيسترى ايدا بالاەۆادان ەكس-مينيستر اباەۆتان قالعان، بۇگىندە ءىز-حابارسىز «ىشىنەن تىنىپ جاتقان» ۆەدومستۆونىڭ بۇقارالىق اقپاراتتى ازىرلەۋ مەن تاراتۋدى رەتتەيتىن جاڭا زاڭ جوباسىنىڭ دايىندىق بارىسىن جانە وعان قاتىستىرۋدى سۇرادى. ازاماتتىق قوعامدى دامىتۋ جانە ونى ەلدىڭ ساياسي ومىرىنە ەتەنە قاتىستىرۋ تۋرالى ءجيى ايتاتىن مينيسترلىك اتالعان زاڭ جوباسىن «جۇمباقتاپ» وتىر. قازىرگى تاڭداعى جۇمىس توبى مەن پروتسەسس قاي كەزەڭدە ءجۇرىپ جاتقانى جايلى دەرەك جوقتىڭ قاسى.

«ءادىل ءسوز» قورى سۇراۋ-مالىمدەمەسىندە 2017 جىلعى قاراشادا سول كەزدەگى اقپارات ءمينيسترى لاۋازىمىندا بولعان داۋرەن اباەۆ كەلەر جىلى (2018 جىل – QT) باق قىزمەتىن رەتتەيتىن مۇلدەم جاڭا زاڭ ازىرلەنەتىنىن حابارلاعانىن ەسكە الادى. اباەۆ بۇل زاڭ جوباسىنىڭ ءبىر ەمەس، 2-3 جىلدا دايىندالاتىنىن ايتقان.

قور دەرەگىنشە، ءتورت جىل بۇرىن «ءادىل ءسوز» مينيسترلىككە جاڭا زاڭ جوباسىن ازىرلەۋگە اتسالىسۋ ءارى ىنتىماقتاستىق جونىندە ۇسىنىسپەن جۇگىنگەن. 2018 جىلعى قاڭتار ايىندا سول تۇستاعى ۆيتسە-مينيستر الان اجىباەۆ ءوز اتىنان «ۆەدومستۆو اقپارات سالاسىنداعى جاڭا زاڭ جوباسىن ازىرلەۋ باستالاردا مىندەتتى تۇردە حابارلايمىز» دەپ ۋادە بەرىپ، جاۋاپ حات جولداعان.

بۇعان دەيىن 2018 جىلدىڭ سوڭىنا قاراي مينيسترلىكتىڭ باق سالاسىنداعى مەملەكەتتىك ساياسات دەپارتامەنتى ديرەكتورى بەكزات راحيموۆ «مەديا قۇرىلتايدا» سويلەگەن سوزىندە: «بۇل جاڭا زاڭ بولادى. ءبىز قوعامعا تانىستىرۋ نۇسقالارى جونىندە زەرتتەدىك. «باق تۋرالى» جاڭا زاڭ بولا ما، الدە ول قولدانىستاعى زاڭداردى بىرىكتىرە مە؟ اقپارات سالاسى بويىنشا بىرىزدەندىرىلگەن زاڭ، وندا باق ماسەلەلەرىنە ارنالعان جەكەلەگەن تاراۋلار بولماق» دەگەن ەدى.

«ارادا ءبىرشاما جىل ءوتتى. پرەزيدەنت حالىق ۇنىنە قۇلاق اساتىن مەملەكەت ساياساتىن جاريالاپ، دايەكتى جۇرگىزىپ كەلەدى. ونىڭ ازاماتتىق قوعامدى ادام قۇقىقتارى سالاسىنداعى زاڭ شىعارۋ پروتسەسىنە تارتۋ تۋرالى تالابى كوپ مارتە ايتىلدى. الايدا بۇعان ازاماتتىق قوعام مەن تىلشىلەر قاۋىمىن قاتىستىرماق تۇگىلى جاڭا زاڭ جوباسىنىڭ جۇمىسى تۋرالى ءالى كۇنگە دەيىن بىردە-ءبىر اقپارات جاريالانباعان. سونىمەن قاتار، باسقا دا مەملەكەتتىك مەكمەلەر، اتاپ ايتقاندا، تسيفرلىق دامۋ مينيسترلىگى جۋرناليستەردىڭ قۇقىعى مەن ءسوز بوستاندىعىن نەگىزسىز شەكتەيتىن زاڭنامالىق جاڭالىقتاردى ۇسىنىپ كەلەد»، – دەلىنگەن ۇيىم مالىمدەمەسىندە.

وسىعان بايلانىستى «ءادىل ءسوز» تاعدىرى جۇمباق زاڭ جوباسىن دايىنداۋ جولىندا جاريالىلىق-اشىقتىق جانە ىنتىماقتاستىق تانىتۋدى سۇرايدى. سونداي-اق، ەڭ باستىسى، قوعامنىڭ ۇيىمدىق وكىلى رەتىندە  وسى باعىتتا كومەكتەسۋگە تاس-ءتۇيىن دايىن ەكەنىن مالىمدەيدى.

"The Qazaq Times"