Tayau Şığıstağı jağday künnen künge uşığıp baradı. Bügin Izrail' äskeri Gaza sektorın zımıranmen atqıladı. Al palestindikter Izrail'ge qaray 130-dan astam zımıran jibergen.

Palestina Densaulıq saqtau ministrliginiñ mälimdeuinşe, şabuıl saldarınan 21 adam qaza tapqan. Arasında balalar bar. Bwdan keyin Gaza sektorına baqılau jasaytın «Hamas» wyımı qarımta şabuıl jasağan. Tel'-Aviv jaqqa 200-ge juıq snaryad atqılanğan. Evrey astanasında äue dabılı qosılıp, adamdar jertölege tığıldı.

Zımırandardıñ biri Tel'-Avivten mañındağı eldi mekenderge qatınaytın jolauşılar avtobusına tüsken. Şabuılğa baylanıstı Ben Gurion atındağı äuejay jwmısı toqtağan. Ğimarattan adamdardı evakuaciyalağan. Al Tel'-Avivke baruı tiis reysterdi Kiprge jiberip jatır.

Izrail'diñ qorğanıs armiyası Palestinanıñ jüz şaqtı äskeri nısanın atqıladı. Olardıñ bir böligi twrğın üylermen qatar ornalasqan. Keşe keşke palestinalıq BAQ birneşe twrğın üydiñ qirağanın, ondağan adamnıñ zardap şekkenin habarladı. Izrail' tarabı tek radikaldı toptar şoğırlanğan nısandardı atqılağanın mälimdedi.

Halıqaralıq qauımdastıqtar Izrail' äskerinen Gaza men Qwdıstağı beybit twrğındarğa şabuıl jasaudı tez arada toqtatudı talap etti. Jağdaydı jiti baqılap otırğan Euroodaq pen AQŞ taraptardı sabırğa şaqırdı. BWW-nıñ Tayau Şığıstağı elşisi Tor Vennesland Izrail' men Gazadağı Palestina toptarı arasındağı qaqtığıs soğısqa wlasuı mümkin deydi.

"The Qazaq Times"