Miting ötetin orın retinde bekitilgen alañnıñ jiegindegi şekteu şarbağı. QazWĞA Ğılım ordası kitaphanasınıñ kireberisi. Säuir 2021 jıl. Foto: QT / Kültegin Aspanwlı

Köktem tuğalı Qazaqstanda 101 mıñnan asa sırqat tirkelip ülgerdi. Respublikanıñ üşinşi tolqında qızıl aymaqqa ötkenine ay taqadı. Kündelikti anıqtalıp jatqan nauqastar sanı eki mıñnan, al ölim jağdayı 20-dan azayar emes. Bwl pandemiya kezindegi eñ auır körsetkiş. Saldarınan Qazaqstan älemde eñ köp adam auırğan elder qatarında bir satığa köterilip, 47-orınğa ornalastı.

Densaulıq saqtau ministrliginiñ resmi mälimetinşe, elde 26 säuir koronavirus jwqqan 2284 adam, al 25-i küni koronavirus pnevmoniyasına şaldıqqan 12 adam tirkeldi. Qazir elde 42 mıñnan asa adam (U07.1 nemese KVI+ boyınşa 41 861, U07.2 nemese KVI- boyınşa 399) auırıp jatır.

#COVID PTR testi arqılı koronavirus jwqqanı rastalğan nauqastardıñ basım böligi ädettegidey Almatı qalası (689) men astanada (294) tirkeldi. Bwdan özge  Almatı oblısı (264), Qarağandı (250), Aqmola (146) jäne Pavlodar (87) öñirlerinde dert dendep twr. Ötken täulikte aurudan ayıqqan 2494 adam üyine jiberilgen. Bwdan özge jeksenbide jiını 29 adam qaytıs bolğan.

#COVID_pnevmoniyası 25 säuir aqparatı bir täulikke keşigip beriletin koronavirus pnevmoniyasına şaldıqqan 12 nauqas esepke alındı. Vedomstvo dereginşe, Türkistan (4), ŞQO (2), Almatı oblısı men qalası (ärqaysı eki-ekiden), Atırau oblısı men Almatı qalasında (ärqaysında on-onnan) köptep tirkelgen. Sonımen qosa, 55 adam ayığıp şıqqan, tağı 7 adam köz jwmğan.

#Jalpı  DenMin-niñ resmi mälimetinşe, emdelip jatqan 42 260 nauqastıñ 15 mıñdayı auruhanada, 27 mıñı ambulatorlıq baqılauda. Ahualı naşar 756 nauqastıñ jağdayı qiın, ondağı 179 adamnıñ häli öte auır. Bwdan özge 110 sırqat ökpeni jasandı jeldetu apparatımen tınıstap jatır.

Osılayşa äzirge virustıñ taralu qateri jağınan SQO men Türkistan oblısı «jasıl aymaqta». Almatı, ŞQO, Jambıl, Qostanay oblıstarı, Şımkent «sarı», al Atırau, Aqmola, Aqtöbe, BQO, Pavlodar, Mañğıstau, Qızılorda,  Qarağandı oblıstarı, Almatı qalası men astana «qızıl aymaqta» twr.

Ükimet müşeleriniñ mälimetinşe, genomdıq zertteu nätijesinde eldiñ basım böliginen virustıñ braziliyalıq, britandıq jäne oñtüstikafrikalıq ştamdarı anıqtalğan.

Elde qañtar ayınıñ ekinşi jäne aqpan ayınıñ alğaşqı jartısında nauqastar qatarı kürt köbeygen. Aqpan ayınıñ ekinşi jartısında birşama kemigen edi, dese de naurızda qayta arttı. Qazir täuligine keminde 2 mıñ sırqat jäne 20 şaqtı ölim jağdayı tirkelip jatır. Säuir ayında tabılğan keyster sanı – 66 mıñ sırqat jäne 615 ölim jağdayı. Bwl twtas naurız ayınan 32 mıñğa artıq. Jalpı köktemniñ eki ayında 101 mıñ (KVI+ 98 mıñ, KVI- 3 mıñ) nauqas anıqtaldı, 981 adam (KVI+ 827, KVI- 154) ömirden qayttı.

Bıltır 13 naurızdan beri COVID-19 infekciyasın jwqtırğandar qatarı 311 mıñnan, 1 tamızdan bılayğı koronavirus pnevmoniyası 52 mıñnan asqan. DDSW derekqorı men Wlttıq statistikada Qazaqstanda auırğandar sanı 364 mıñğa juıqtağan. Degenmen Ükimet koronavirus pen onıñ pnevmoniyasın eki bölek esepteydi.

Pandemiya bastalğalı jalpı virus jwqqandardıñ 6 mıñı (KVI+ / U07.1 – 3599, KVI- / U07.2 – 782, ilespe aurulardan – 1619) qaytıs bolğan. Alayda Qazaqstan biligi boyınan koronavirus tabılsa da, basqa aurulardıñ sebebinen qaytıs boldı delingenderdi jalpı statistikağa engizbeydi. Bwğan qarsı sarapşılardıñ sözine qarağanda, koronavirustıñ janama äserinen qaytqandardıñ jartısınan astamınıñ sebebi qan aynalımı jüyesiniñ auruları bolğandıqtan, oğan infekciya dert qozdıruşı faktor retinde ölimge äkep soqtırğan. Eskerer jayt, ministrlik 2020 jılı KVI- statistikasın esepke almas bwrın jıldağıdan üş esege ösken pnevmoniyanıñ 256 mıñ jağdayınan (bıltırğı qañtar-şilde aralığındağı) koronavirustıq türin anıqtap-zertteuden bas tartqan. Mamandar osı keysterdi ob'ektivti türde zerdelegende şınayı esep qazirgiden äldeqayda köp bolar edi dep esepteydi. Demek joğarıdağı san da naqtı bolmauı mümkin.

Qazaqstan virus taraluı boyınşa älemde Worldometers derekqorı, Djons Hopkins universiteti jäne DDSW tizimindegi 221 el men aymaqtıñ arasında 47-orında twr.

Ükimettiñ soñğı deregine qarağanda, Qazaqstanda 950 mıñ adam koronavirusqa qarsı reseylik «Sputnik V» jäne otandıq QazVac vakcinasınıñ alğaşqı dozasın alğan.

"The Qazaq Times"