Astrahan oblısına (Resey) şekaralas jatqan (Atırau oblısı Qwrmanğazı audanı) Köptoğay auılınıñ twrğındarı auıl jeriniñ keybir böligi Reseyge ötip kete me dep alañdap otır. Bwğan sebep – auılğa birneşe kün bwrın şekaraşılar kelip, şekara sım temirin Köptoğayğa qaray jıljıta bastağanı. "The Qazaq Times" tilşisi twrğındarmen söylesip, mäseleniñ män-jayın bilip kördi. 

– Sovet kezinde şekarada qorşau bolğan joq. Tek belgi retinde qazıqtar qağılıp twratın.   Jerimizdi soğan qarap anıqtap jürdik. Ol kezde şekara belgisi auıldan 30 şaqırımday edi. Besaral degen şabındıq jerimiz boldı. Şwraylı edi öte. Osıdan 10 şaqtı jıl bwrın şekara jañadan belgilenip, auılğa 2 şaqırımday jerden sım temirmen qorşaldı. Solayşa Besaralımız Resey jaqta qalıp qoydı. Ol kezde şulap-şulap qoyğan edik. Endi mine atam zamannan bala-şağa oynap, su alıp işip otırğan jerimiz şekaranıñ arğı betinde qalıp qoymaq, – deydi Köptoğay auılınıñ tuması Ğazizbek Tölegen.

Köptoğaydıñ tağı bir twrğını Damir Aymaşevtıñ sözinşe, auılğa kelgen şekaraşılar eşteñe tüsindirmesten, şekaranı jañadan qorşay bastağan. Alayda twrğındardıñ qarsılığına tap bolğan soñ jwmıstarın uaqıtşa toqtatuğa mäjbür bolğan. Sodan soñ Qwrmanğazı audanı äkimi Marat Mwrziev kelip, twrğındarğa şekaraşılar 2005 jılı Mäskeude qol qoyılğan “Qazaqstan-Resey memlekettik şekarası turalı kelisimige" say jwmıs jürgizip jatqanın aytqan. Alayda twrğındar bwl qwjattan mülde beyhabar.

– Eger şekaraşılar jwmısı äkim aytqanday 2005 jılğı kelisimge say jürgizilip jatqan bolsa, biz nege bwl jaylı endi bilip jatırmız? Ol qwjatqa kim qol qoyğan? Şeşim 2005 jılı şıqsa, nege osı uaqıtqa deyin bizge bir auız aytılmadı. Qalayşa bizdiñ bwrınnan bergi ata-qonısımız bolıp kelgen auıl irgesindegi jer äp sätte Reseyge ötip ketedi? Osı swraqtar mazalaydı bizdi, – dep nalıdı auıl twrğını Damir Aymaşev.

Onıñ sözinşe, audan äkimi Mwrziev "düysenbi küni auılğa oblıstan arnayı komissiya kelip, şekarağa qatıstı jinalıs ötkizetin" aytıptı. Al şekaraşılar twrğındar narazılğınan soñ, keşe tüsten keyin Köptoğayğa qaray jaqındatqan şekara qorşauın qayta jinay bastağan. Biraq twrğındarğa ne sebepti jinap jatqandarın tüsindirmegen. Damir Aymaşevtıñ payımdauınşa, şekaraşılardıñ bwl äreketine twrğındar qarsılğı men äleumettik jeli reakciyası sebep bolğan boluı mümkin.

– Auılğa qaray jaqındatqan şekara qorşauınıñ jartısın jinap äketti. Biraq küdigimiz äli seyilgen joq. Reseylik şekaraşılar da öz jağındağı şekara bağanaların qazıp äketip jatır. Osınıñ bäri tüsiniksiz. Biz bireudiñ jerine talasıp jatqan joqpız. Bar bolğanı öz jerimiz özimizde qalsa dep otırmız, – deydi ol.

Keşe äleumettik jelide Qazaqstan men Resey şekarasına jaqın ornalasqan Köptoğay auılında jer dauı bolıp jatqanı jaylı aqpar tarağan. Artınşa Atırau oblısınıñ Öñirlik kommunikaciyalar qızmeti 14 säuirden bastap Köptoğayda Qazaqstan men Resey şekarasında jaña şekaralıq qorşau salu jwmıstarı bastalğanın habarladı.  Äkimdik mälimetinşe, bwl jwmıstar 2005 jılı Mäskeude qol qoyılğan “Qazaqstan-Resey memlekettik şekarası turalı kelisim” boyınşa jürgizilip jatır. Alayda äkimdik atalağan kelisim jaylı tolıq aqparat bergen joq. Qwrmanğızı audanınıñ äkimi Marat Mwrziev Qazaq Times tilşisiniñ osı mäselge baylanıstı telefon arqılı qoyğan swraqtarına jauap beruge qwlıqsızdıq tanıttı. Ol "resmi habarlamada aytılğan mälimetten basqa eşqanday pikir ayta almaymın" dedi.

"The Qazaq Times"