Marat Ahmetjanov. Foto: atameken.kz

Jemqorlıq jağınan Tanzaniyamen qatar twratın Qazaqstan Antikorınıñ törağası auıstı. Prezident Toqaevtıñ jarlığımen Sıbaylas jemqorlıqqa qarsı is-qimıl agenttiginiñ törağası bolıp Marat Ahmetjanov tağayındaldı.

Aqordanıñ habarlauınşa, antikordı tört jılday basqarğan Alik Şpekbaev agenttik basşısı qızmetinen bosatıldı, äzirge onıñ qayda bararı belgisiz.

56 jastağı Marat Ahmetjanov keyingi bes jılda bas prokurordıñ orınbasarı bolğan. Bwğan deyin Sıbaylas jemqorlıqqa qarsı küres agenttigi törağasınıñ orınbasarı, agenttiktiñ Atıray öñirindegi departamentiniñ jetekşisi, Pavlodar jäne Oñtüstik Qazaqstan oblıstarınıñ prokurorı lauazımında qızmet atqarıp, Qwqıqtıq statistika komitetin basqarğan.

Ömir boyı memlekettik qwrılımda jwmıs istep kele jatqan Ahmetjanov joğarı bilimdi zañgerlik sala boyınşa Böketov atındağı Qarağandı Memlekettik Universitetinde alğan. 30 jılğa juıq täjiribesinde Temirtau qalasınan bastap Bas prokuraturağa deyin mansap qwrğan. Adam haqı jii bwzılatın Qazaqstanda 2019 jıldan beri prezident janındağı Adam qwqıqtarı jönindegi komissiyanıñ müşesi.

63 jastağı Alik Şpekbaev Sıbaylas jemqorlıqqa qarsı is-qimıl agenttigin 2017 jıldan bastap basqardı, oğan deyin üş jıl törağa orınbasarı lauazımında boldı. Sonday-aq, 35 jıldan asa küştik-qwzırlı organdarda jürgen ol Prezident äkimşiliginiñ Qwqıq qorğau jüyesi bölimi basşısı, işki ister vice-ministri boldı, qwqıq qorğau organdarında türli qızmette bolğan. Nazarbaevtıñ twsında «Dañq» jäne «Qwrmet» ordenderi, Qazaqstannıñ Täuelsizdigi men Konstituciyasınıñ 10 jıldıq mereytoylıq medaldarimen marapattalğan.

Sarapşılar men azamattıq qoğam belsendileri elde jemqorlıq barlıq äleumettik-sayasi ömirdi tügel şarpığanın aytıp, köp sınaydı. Jas respublikada qarapayım mektep direktorınan bastap premer-ministr, Ükimet qwramınıñ birqatar müşeleri, sot jüyesiniñ sudyaları jemqorlıq boyınşa ayıptalıp, sottalıp jatadı. Halıqaralıq Transparency International  wyımı biıl qañtarda jasağan «Jemqorlıq indeksinde» Qazaqstan jemqorlıqqa jaqın elder tiziminde atalğan. Qazaqstan 180 el tizimdelgen reytingte Efiopiya, Peru, Serbiya, Şri-Lanka, Surinam jäne Tanzaniyamen birge 94-orında twr.

"The Qazaq Times"